«Kókshetaý - Shymkent» baǵytynda jańa áýe reısi ashyldy

Alǵashqy reıspen Aqmola oblysynyń ákimi Málik Mýrzalın bastaǵan top Shymkent áýejaıyna taban tiredi, dep habarlaıdy QazAqparat HAA tilshisi

Tasymaldaýǵa arnalǵan ushaq túri kanadalyq  CRJ-200. Jol júrý baǵasy -  20 myń teńgeni quraıdy. Qazirdiń ózinde  «Shymkent-Kókshetaý» baǵytyn jandandyrý maqsatynda, qos qalada da halyqtyń kóp shoǵyrlanatyn oryndarynda jarnamalar ornatylǵan. Delegattardy arnaıy kútip alǵan Ońtústik Qazaqstan oblysynyń ákimi Janseıit Túımebaev jańa baǵyt eki oblystyń saýda-ekonomıkalyq qatynastarynyń nyǵaıýyna, týrızm salasynyń qarqyndy damýyna septigin tıgizetindigin jetkizdi. 
 

«Elimizdiń Ońtústigi men Soltústigin jalǵaıtyn áýe keńistiginde altyn kópir ornatylyp otyr. Búgingi kúnnen bastap, aptasyna 2 ret jıilikpen «Shymkent-Kókshetaý» áýe baǵyty boıynsha aptanyń juma, jeksenbi kúnderi áýe reısteri oryndalatyn bolady. Elimizdiń maqtanyshy sanalatyn Býrabaı demalys aımaǵyna elimizdiń ǵana emes, sheteldiń de qyzyǵýshylyǵy óte joǵary. Budan bylaı oblys turǵyndary  Býrabaıǵa «Shymkent-Kókshetaý» áýe baǵytyn paıdalana otyryp, barýyna úlken múmkindik paıda boldy», - dedi Janseıit Túımebaev.
 

Sonymen qatar, oblystyń Túrkistan, Otyrar, Saıram, Qazyǵurt, Qasqasý sııaqty týrıstik aımaqtaryna Aqmola oblysynan týrısterdiń áýe baǵyty arqyly kelýine múmkindik týyp otyr. 
 

 Ońtústikke issapary barysynda kókshetaýlyq delegatsııa basshylyǵy men Ońtústik Qazaqstan oblysynyń ákimdigi eki jaqty yntymaqtastyqty arttyrý jóninde kelissózder júrgizdi. Atap aıtqanda, Ońtústik Qazaqstan oblysy men Aqmola oblysy ákimdikteri arasynda ózara yntymaqtastyq týraly memarandýmǵa  qol qoıyldy.

 Sondaı-aq, Shymkent pen Kókshetaý  qalalary arasynda  baılanys ornatý jáne «Shymkent» ÁKK UQ men «Esil» ÁKK UQ arasyndaǵy yntymaqtastyqty kúsheıtý týraly, «ENKI» JShS men OQO qurylys basqarmasy ózara memorandým jasasty. Kelisimder eki oblys arasyndaǵy qarjylyq damý men yntymaqtastyq baılanysty kúsheıtýge baǵyttalǵan.