Kókshetaý, Semeı, Óskemen JEO-lary qashan ashylady
ASTANA. KAZINFORM — «Samuryq-Energo» AQ basqarma tóraǵasy Qaırat Maqsutov Kókshetaý, Semeı, Óskemen JEO qurylysy qaı kezeńde turǵanyn aıtyp berdi. Jańa JEO nysandary elimizdegi ekologııalyq zańnama talaptaryna sáıkes jumys istep, jasandy ıntellekt pen «taza kómir» tehnologııasyn qoldanbaq.
Búgingi tańda Kókshetaýda JEO boıynsha jobalaý jáne qurylys jumystary júrgizilýde. Atap aıtqanda, barlyq qajetti kommýnıkatsııalar tartyldy. Kirme joldar salyndy. Sondaı-aq, JEO ózi jáne ınfraqurylymdyq nysandar boıynsha jobalaý-smetalyq qujattama ázirlenýde.
— Bıyl kúl úıindisi men bas korpýs irgetasy boıynsha júmystardy bastaımyz. Jylý qýatyn 520 gıgakalorııdan 820 gıgakalorııǵa deıin ulǵaıtý jumystaryn júrgizilýde. Merdigermen jasalǵan sharttarǵa tıisti ózgerister engizildi. Sáýir aıynyń sońynda Energetıka mınıstrligimen qosymsha kelisimge qol qoıý kútilýde. Osy joba boıynsha negizgi jabdyqtardy jetkizý 2027 jyldyń birinshi toqsanynda bastalady. Stantsııany 2029 jylǵy birinshi toqsanda paıdalanýǵa berý josparlanyp otyr, — dedi Q. Maqsutov Úkimettiń búgingi otyrysynda.
Semeı men Óskemendegi stantsııalardy iske qosý merzimi 2029 jylǵy tórtinshi toqsanǵa josparlanyp otyr. Qos qaladaǵy JEO boıynsha 2026 jyly 30 qańtarda Qazaqstan sıngapýrlyq konsortsıýmmen EPC kelisimshattar jasady. Eki joba boıynsha birneshe shara josparlanyp otyr.
— Merdiger negizgi jabdyqtardy daıyndaý úshin 2026 mamyr aıynda zaýyttarǵa tapsyrystar berýdi bastaıdy. Al osy aıda ınjenerlik-geologııalyq jáne topografııalyq izdenister júrgizip, alań aýmaqtary men ınfraqurylymdy daıyndaý jumystary bastalady. Negizgi jabdyqtardy jetkizý 2027 jyldyń úshinshi toqsanynda bastalady, — dedi «Samuryq-Energo» tóraǵasy.
Atalǵan úsh stantsııa da jasandy ıntellekt jáne «taza kómir» tehnologııasyn qoldanatyn bolady. Jasandy ıntellekt boıynsha negizgi jabdyqtarǵa predıktıvti dıagnostıka engizý maqsatynda vıbratsııalyq, akýstıkalyq, termııalyq jáne basqa da datchıkter ornatylady. Osy datchıkterden alynǵan aqparat aqaýlardy ýaqytyly anyqtaýǵa jáne apattardy boldyrmaýǵa múmkindik beredi.
«Taza kómir» tehnologııasy boıynsha jańa kómir stantsııalaryna tútin gazdaryn tazartýdyń zamanaýı júıeleri engiziledi. Atap aıtqanda, tómen emıssııaly ottyqtar, bul jabdyq qazandyqtyń ishinde azot oksıdi shyǵaryndysyn tómendetýge múmkindik beredi. Kúldi ustaý úshin elektrostatıkalyq jáne sorǵy fıltrleri qoıylady.
Sonymen birge, árbir qazandyq ishine jeke kúkirt tazartý reaktorlary ornatylady. Nátıjesinde biz taza kómir tehnologııasyn qoldaný arqyly zııandy zattardy barynsha azaıtýǵa qol jetkizemiz.
Buǵan deıin Qaırat Maqsutov Ekibastuz GRES úshinshi energoblogy 2028 jyly iske qosylatynyn aıtqan edi. Jańa energobloktardyń iske qosylýy qýat tapshylyǵyn jaýyp qana qoımaı, derekterdi óńdeý ortalyǵyn, protsessordy salqyndatý júıelerin damytýǵa múmkindik beredi.
Sondaı-aq «Samuryq-Energo» AQ Ekibastuz qalasynda jańa áleýmettik nysandar salady.