Kókshetaý polıtseıleri 50 myń dollar aldy degen kúdikke ilindi

NUR-SULTAN. QazAqparat - Sybaılas jemqorlyqqa qarsy qyzmet Kókshetaý qalasy polıtsııa basqarmasynyń laýazymdy tulǵalaryna qatysty basqa organnyń is júrgizýinde jatqan qylmystyq isti toqtatqany úshin kásipkerden 50 myń AQSh dollary somasynda aqsha alý faktisi boıynsha sotqa deıingi tergeý júrgizýde, - dep habarlaıdy QazAqparat.

Antıkordyń málimetinshe, 8 shilde kúni júrgizilgen jedel-tergeý is-sharalarynyń nátıjesinde QPK-tiń 128-baby tártibimen Kókshetaý qalasy polıtsııa basqarmasy bastyǵynyń orynbasary ustaldy.

«9 shilde kúni Kókshetaý qalasynyń tergeý soty kúdiktige qatysty «kúzetpen ustaý» túrindegi bultartpaý sharasyn sanktsııalady. Qazirgi ýaqytta sotqa deıingi tergeý júrgizilýde. Tergeý múddesine sáıkes, ózge aqparat jarııa etýge jatpaıdy», - dep jazdy vedomstvo.