«Kókshetaý — Petropavl» tas jolyn keńeıtý isine kirisý kerek — Toqaev
ASTANA. KAZINFORM — Negizgi maqsat — elimizdiń joldarynyń áleýetin nyǵaıtyp, azamattarymyzdyń tabysyn arttyrý. Bul týraly Qazaqstan halqyna Joldaýyn jarııalaý kezinde Prezıdent Qasym-Jomart Toqaev málim etti.
— Biz Qazaqstannyń barlyq aımaǵyn baılanystyratyn, ıaǵnı, elimizdiń tranzıttik áleýetin kúsheıtetin zamanaýı, óte damyǵan temirjol jáne kólik joldarynyń tutas jelisin qurýymyz kerek. Bul — strategııalyq mindet. Elimiz arqyly tasymaldanatyn júk kólemi jyl saıyn ulǵaıyp keledi. Demek bizdiń aldymyzda jol ınfraqurylymyn jaqsarta túsý mindeti áli de tur. Bul, ásirese, soltústik aımaqtarǵa qatysty ózekti másele. Sondyqtan endigi kezekte «Kókshetaý — Petropavl» tas jolyn keńeıtý isine kirisý kerek, — dedi Qasym-Jomart Toqaev.
Prezıdenttiń aıtýynsha, avtokólikpen júk tasymaldaıtyn otandyq kásipkerlerimizge járdem kórsetý qajet. Sebebi Qazaqstan arqyly ótetin avtokólik tranzıtiniń jartysynan kóbi sheteldikterge tıesili.
— Osy salany da retke keltiretin ýaqyt keldi, Úkimet tıisti is-áreketterdi qoldanady. Negizgi maqsat — elimizdiń joldarynyń áleýetin nyǵaıtyp, azamattarymyzdyń tabysyn arttyrý, — dedi Memleket basshysy.
Buǵan deıin Prezıdent Qasym-Jomart Toqaev Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Joldaýyn jarııalap jatqanyn jazǵan edik.
