13:00, 29 Maýsym 2023 | GMT +5
Kókshetaý men Semeıde jylý elektr ortalyǵy salynýy múmkin
ASTANA. QazAqparat – Kókshetaý men Semeıde jylý elektr ortalyǵyn salý máselesi úkimet deńgeıinde qaralyp jatyr. Bul týraly Premer-Mınıstr Álıhan Smaıylov AMANAT atynan saılanǵan máslıhat depýtattarynyń respýblıkalyq forýmynda málim etti, dep habarlaıdy QazAqparat tilshisi.
«Elektr energetıka salasynda óńirlerde jańa jobalar iske asyp jatyr. Osy jyly qýattylyǵy 600 MVt-tan asatyn elektrostantsııalardy modernızatsııalaý aıaqtalady. Almaty men Túrkistanda 2025-2026 jyldary beriletin jalpy qýaty 2,3 GVt-tan asatyn gaz generatsııasynyń energetıkalyq jobalary iske qosylady», - dedi ol.
Úkimet basshysy Qyzylordada jańa jylý elektr ortalyǵynyń qurylysy bastalǵanyn aıtty.
«Kókshetaýda jáne Semeıde 2 jylý elektr ortalyǵyn salý máselesi qarastyrylýda. Sonymen qatar aǵymdaǵy jyly jalpy qýaty 276 MVt bolatyn jańartylatyn energııa kózderiniń 10 jobasy qoldanysqa engiziledi», - dedi Álıhan Smaıylov.