Kókshetaý men Qaraǵandydan elordaǵa qatynaıtyn elektr poıyzdaryna kóńilińiz tola ma
ASTANA. QazAqparat - Májilis depýtattary Astanaǵa qatynaıtyn elektr poıyzdarynyń sanyn kóbeıtýdi surady. Osy oraıda QR Investıtsııalar jáne damý mınıstri Jeńis Qasymbekke tıisti saýal joldady, dep habarlaıdy QazAqparat.
«Atap aıtqanda, «Astana-Qaraǵandy-Astana», «Astana-Kókshetaý-Astana» jáne «Astana-Pavlodar-Astana» baǵyttaryndaǵy elektr poıyzy qatynasyn jetildirý qajet dep sanaımyz. Óıtkeni atalmysh baǵyttar boıynsha elektr poıyzy kún saıyn 2-3 ret qatynaıtynyna qaramastan, jolashylar olarǵa ásirese aptanyń juma, senbi, jeksenbi jáne mereke kúnderi bılet alý qıynǵa túsetindigine renish bildirýde. Atalǵan elektr poıyzdaryna bıletti alyp-satýmen aınalysatyn adamdar da bar kórinedi. Osy jóninde bizge keıingi kezde saılaýshylar tarapynan aryz-shaǵymdar aıtylyp júr»,-dep toqtaldy depýtat Káribaı Musyrman Májilistiń jalpy otyrysy barysynda.
Onyń sózine qaraǵanda, jolaýshylar elektr poıyzymen júrý áldeqaıda qolaıly ári arzanǵa túsendigin eskerýdi surap otyr. Osyǵan oraı atalǵan baǵyttardaǵy elektr poıyzdar sanyn kóbeıtý qajettigi týyndap otyrǵandyǵy anyq.
«Munyń ózi jeke kóliktermen zańsyz taksı qyzmetin kórsetýmen aınalysatyn júrgizýshiler sanyn kemitip, avtomobıl joldaryndaǵy JKO-lardy azaıtýǵa, ıaǵnı jolaýshylardyń qaýipsizdigin arttyrýǵa da oń yqpalyn tıgizeri daýsyz. «Astana-Qaraǵandy-Astana», «Astana-Kókshetaý-Astana» jáne «Astana-Pavlodar-Astana» baǵyttaryndaǵy elektr poıyzdaryna jolaýshylardyń suranysyn zerttep, atalǵan baǵdarlarda juma, senbi, jeksenbi jáne mereke kúnderi qosymsha poıyzdardy júrgizý múmkindigin qarastyrýdy usynamyz»,-dep túıindedi sózin K. Musyrman.
