Kókshetaý mektepterine shabýyl jasalǵany týraly feık aqparat taratqandar anyqtalyp jatyr

KÓKShETAÝ. KAZINFORM — Polıtsııa qyzmetkerleri áleýmettik jelilerde taraǵan Kókshetaý qalasyndaǵy birneshe mektepke shabýyl jasalatyny týraly aqparattyń jalǵan ekenin málimdedi.

Chattarda taraǵan skrınshottarǵa sáıkes, Kókshetaýda birneshe mektepke bir mezette shabýyl daıyndalyp, belgisiz adamdar oqýshylarǵa qoqan-loqy kórsetkeni týraly aqparat taraǵan. Osy habarlamadan keıin ata-analar alańdap, balalaryn sabaqtan alyp ketýge nıet bildirgen.

Aqmola oblystyq polıtsııa departamentiniń baspasóz qyzmeti habarlaǵandaı, áleýmettik jelilerde taraǵan bul málimet boıynsha polıtsııa tekserý jumystaryn júrgizip jatyr.

— Alǵashqy tekserý barysynda bul derekter rastalǵan joq. Taratylǵan aqparat feık bolyp shyqty jáne shyndyqqa janaspaıdy. Qazirgi ýaqytta qaýipsizdikti qamtamasyz etý sharalary qabyldandy, — delingen vedomstvo habarlamasynda.

Sonymen qatar polıtsııa qyzmetkerleri jalǵan habarlamanyń avtorlaryn anyqtaý boıynsha keshendi sharalar júrgizip jatyr. Vedomstvonyń málimetinshe, jaǵdaı polıtsııa departamenti basshylyǵynyń qatań baqylaýynda.

Polıtsııa azamattardy sabyr saqtaýǵa, tek resmı aqparat kózderine senýge, sondaı-aq tekserilmegen habarlamalardy taratpaýǵa shaqyrdy.

Eske sala keteıik, buǵan deıin Almaty polıtsııasy da mektepterge shabýyl daıyndalyp jatqany týraly aqparatty joqqa shyǵarǵan bolatyn.

Áleýmettik jelide Shymkenttegi birneshe mektepke shabýyl jasalady degen jalǵan aqparat tarady.