Kókshetaý mektepterine Abaı men Ál-Farabı esimderi beriletin boldy
Oblys ákimi selektorlyq rejimdegi Aqmola oblystyq máslıhatynyń kezekti sessııasyna qatysqan. Jıynda óńirde týrızmdi damytýdyń ahýaly men bolashaǵy, Aqmola oblystyq máslıhatynyń 2019 jylǵy qyzmeti týraly esep, oblys boıynsha qorshaǵan orta sapasynyń nysanaly kórsetkishterin bekitý, jasyl ekpelerdi kútip-ustaý jáne qorǵaý qaǵıdalaryn bekitý jaıy qaralǵan.
«Sonymen qatar, «Aqmola oblysy boıynsha áleýmettik mańyzy bar qatynastardyń tizbesin aıqyndaý týraly» oblystyq máslıhattyń 2019 jyldyń 10-shy sáýirindegi sheshimine ózgerister engizý talqylandy, budan bólek, Aqmola oblysynda syrtqy (kórneki) jarnamany eldi mekenderdegi úı-jaılardyń sheginen tys ashyq keńistikte, jalpyǵa ortaq paıdalanylatyn avtomobıl joldarynyń bólingen beldeýinde, eldi mekenderden tys jerdegi úı-jaılardyń sheginen tys ashyq keńistikte jáne jalpyǵa ortaq paıdalanylatyn avtomobıl joldarynyń bólingen beldeýinen tys jerde ornalastyrý tártibi men sharttary týraly erejeler bekitildi. №3 oblystyq mamandandyrylǵan mektep-ınternatyna Abaı esimin, ІT mektep-lıtseıine Ál-Farabı atyn berý týraly usynys engizildi», - dep jazdy Ermek Marjyqpaev Instagram -daǵy paraqshasynda
Aımaq basshysy atap ótkendeı, máslıhat sessııasynda oblys ákimdiginiń janynda jumys isteıtin konsýltatıvtik-keńesshi organdardaǵy ózgerister boıynsha 7 sheshim qabyldandy.
«Buryn kún tártibinde málimdelgen 2020-2022 jyldarǵa arnalǵan oblystyq bıýdjetke ózgerister engizý týraly másele Respýblıkada tótenshe jaǵdaı engizilýine baılanysty aldaǵy ýaqytta memlekettik bıýdjetti ońtaılandyrýǵa oraı respýblıkalyq bıýdjet naqtylanǵanǵa deıingi merzimge aýystyryldy», - dep tolyqtyrdy aımaq basshysy.
