Kókshetaý mańyndaǵy jol apaty 2 adamnyń ómirin qıyp ketti
KÓKShETAÝ. QazAqparat – Kókshetaý qalasynyń mańynda jol apaty oryn alyp, 2 adam kóz jumdy, taǵy 2 adam túrli dene jaraqatymen aýrýhanaǵa jetkizildi, dep habarlaıdy QazAqparat tilshisi.
Aqmola oblystyq PD málimetinshe, jol apaty 2020 jylǵy qyrkúıektiń 30-da saǵat 16:44 shamasynda «Nur-Sultan – Petropavl» tas jolynyń Kókshetaý qalasynan jetinshi shaqyrym tusynda oryn alǵan.
«Anyqtalǵandaı, Petropavl qalasyna baǵyt alǵan «VAZ-2106» jeńil kóliginiń júrgizýshisi joldyń shetinde turǵan «Foton» kóligine soǵylǵan. Sońǵysynyń júrgizýshisi kóliktiń dóńgelegin aýystyryp jatqan. Jol apatynan jeńil kóliktiń eki jolaýshysy oqıǵa ornynda kóz jumdy. Al, júrgizýshisi men taǵy bir jolaýshy túrli dene jaraqatymen Aqmola oblystyq kópbeıindi aýrýhanasyna jetkizildi», - deıdi vedomstvonyń baspasóz qyzmeti.
Qazirgi kezde jol apatyna baılanysty sotqa deıingi tergeý amaldary bastalyp ketti.
