Kókshetaý kúnine tartý: 195 páterdiń kilti tapsyryldy
Kókshetaý qalasynyń 195-jyldyǵyna arnalǵan oblys ortalyǵyndaǵy Abylaı han alańynda «Kókshetaý – baqytty otbasy mekeni» taqyrybymen ótken sharaǵa Aqmola oblysy ákimi Ermek Marjyqpaev qatysyp, turǵyndarǵa jańa páter kiltin tapsyrdy.
Atalǵan turǵyn úı memlekettik «Nurly jer» baǵdarlamasy boıynsha salynyp otyr. Kópqabatty jańa turǵyn úıden baspanaly bolyp otyrǵandar arasynda kópbalaly jáne áleýmettik jaǵynan az qamtylǵan otbasylar, jetimder bar.
«Elimizdiń Tuńǵysh Prezıdenti – Elbasy Nursultan Nazarbaev: «Otanǵa degen súıispenshilik otbasynan bastalady. Týǵan shańyraqtan alǵan tárbıe – bul barsha halqymyzdyń baqýatty da tabysty bolashaǵynyń kepili» dep atap ótti. Búgingi «Kókshetaý - baqytty otbasy mekeni» atty is-sharamyzdyń basty maqsaty da osy ulaǵatty sózderde jatyr. Osy tamasha kúnde qýanyshqa qonys ulasyp, shańyraqtaryńyzǵa baq – bereke ákelsin», - dedi Ermek Marjyqpaev jańa páter ıelerin quttyqtaý sózinde.
Aımaq basshysy atap ótkendeı, Kókshetaý qalasynyń 195 jyldyǵyna oraı jyl basynan beri ártúrli formatta barlyǵy 300-den astam is-shara uıymdastyrylǵan eken. Sonyń birazy búgin qala kúni júzege asyryldy. Onyń ishinde búgin tańerteń qalanyń mereıtoıyna tartý retinde «Kókshe CITY» seriktestiginde óndiristik jańa tsehy men «Balapan» baǵdarlamasy boıynsha «Zerek» balabaqshasy ashyldy. Sharaǵa qatysqan aımaq basshysy Kókshetaý qalasy boıynsha aldaǵy ýaqytta da balabaqshalar men jańa mektepter qurylysy keń kólemde júrgiziletinin aıtty.
«Kókshetaý» mádenıet saraıynyń alańynda «Qazaqstannyń úzdik taýarlary» aýmaqtyq kórme jármeńkesi qala jurtshylyǵyna kóterińki kóńil-kúı syılasa, «Arqanyń kerbez sulý Kókshetaýy» atty saltanatty sharada kópbalaly analar «Altyn alqa» jáne «Kúmis alqa» tósbelgisimen marapattalsa, oblys ortalyǵynyń damýyna eleýli úles qosqan azamattarǵa «Kókshetaý qalasynyń qurmetti azamaty» ataǵy berildi.
Al, «Qulager» atshabarynda ulttyq sport oıyndary, atjarys tartysty. Eń qyzyǵy «Quraq kórpe – Fest» sharasy jurtshylyqtyń zor yntasyn týǵyzdy. Uzyndyǵy 16 shaqyrym bolatyn kókshetaýlyq sheberler jasaǵan quraq kórpe men osy kórpelerden jasalǵan 34 metr sheńber «Gınnesterdiń rekordtar» kitabyna endi. Endi mine, kópbalaly jáne áleýmettik jaǵynan álsiz toptarǵa jańa 195 páterdiń kilti tapsyrylyp otyr.
Aıta keteıik, búgingi kúni Kókshetaý qalasynda 2 myńnan astam kópbalaly otbasy bolsa, onyń 400-ge jýyǵy páter kezeginde tur. Sondyqtan, bıylǵy jyly barlyǵy 470 páter kiltin tapsyrý josparlanǵan. Onyń birazy Turǵyn úı qurylys jınaq banki arqyly sheshimin tappaqshy
