Kókshetaý kóshelerin jaýynnan keıin sý shaıyp ketedi: másele qashan sheshiledi
ASTANA. KAZINFORM – Jergilikti bılik Kókshetaýda jańbyrdy sorǵylaý stantsııasy iske qosylǵannan keıin P.Osıpenko kóshesin sý basý máselesi sheshilýi tıis dep otyr.
Kókshetaý qalasyndaǵy P.Osıpenko kóshesin ár jaýynnan keıin sý basatyny týraly buǵan deıin birneshe ret jazǵan bolatynbyz. Sirkiregen jańbyrdyń ózi «Rıo» saýda ortalyǵy mańyndaǵy qozǵalysty toqtatyp, turǵyndardyń dittegen jerine jetýin qıyndatady.
Qala bıliginiń ýádesine sáıkes, endi kósheni sý shaıý problemasy qaıtalanbaıdy. Jaýyn sýyn jınap, súzgiler arqyly Qylshaqty ózenine aıdaıtyn shaǵyn sorǵylaý stantsııasy kómektesedi. Sý aldymen súzgiden ótkizilip, sodan keıin ǵana aǵyzylady.
Merdigerdiń aıtýynsha, bul sý aǵynyn durys burmaý kesirinen týyndaǵan. Qazir aqaý túzetildi. Sorǵy stantsııasy saǵatyna 75–80 tekshe metr sý aıdaı alady. Eger júıe atalǵan kólemmen kúrese almasa, qosymsha sorǵy qosyp, qýatyn arttyrý múmkindigi bar.
- Qazir qalanyń jańbyr jáne drenaj júıesin salý boıynsha tehnıkalyq-ekonomıkalyq negizdeme ázirlep jatyrmyz. 10-12 uńǵyma arqyly jyl boıy baqylaý júrgizip, sodan keıin qalanyń tolyq júıesin jasaımyz, - dedi Kókshetaý qalasynyń ákimi Ánýar Kúmpekeev.
Stantsııa ornatý jumystarynyń jalpy quny 40 mıllıon teńge shamasynda boldy. Qurylysy úsh aptada aıaqtalǵan.
Endi turǵyndar jaýyn jaýǵanyn kútip otyr, ıaǵnı jańa júıe sý shaıýdan rasymen de qutqara ala ma, sony tekserý úshin.
Eske sala ketsek, bıyl tamyzda Kókshetaýda jańa sý tazartý qurylystary iske qosyldy.