Kókshetaý kóshelerine Bəıken Əshimov pen Maqtaı Saǵdıevtiń esimderi berildi
KÓKShETAÝ. QazAqparat - Kókshetaý kóshelerine memleket jáne qoǵam qaıratkerleri Bəıken Əshimov pen Maqtaı Saǵdıevtiń esimderi berildi, dep habarlaıdy QazAqparat tilshisi.
Burynǵy Kaptsevıch kóshesine Bəıken Əshimov esimi berilse, Kýıbyshev kóshesi Maqtaı Saǵdıevtiń esimimen atalatyn boldy.
Saltanatty sharaǵa aımaq basshysy Məlik Myrzalın, Bəıken Əshimov pen Maqtaı Saǵdıevtiń urpaqtary jəne qala turǵyndary qatysty.
«Sońynda ólmes sózderi, ónegeli isteri qalǵan Bəıken Əshimov pen Maqtaı Saǵdıev esiminiń Kókshetaý kóshelerine berilýi - uly tulǵalarymyzdyń esimin el esinde saqtaýǵa jasalǵan jaqsy qadam. Olardyń istegen isteri men atqarǵan qyzmetteri - búgingi jastar úshin úlgi ónege», - dep atap ótti M.Myrzalın.
Kókshetaý qalasynyń qurmetti azamaty Bolat Janádilov aqmolalyqtardyń sanasynda óshpes iz qaldyrǵan tulǵalardyń esimin este saqtaý jolyndaǵy ıgi isterine rızashylyǵyn bildirip, osy saltanatqa oraı joldaǵan júrekjardy lebizin aıtyp berdi.
Sonymen qatar, B.Əshimovtyń uly Ońdasyn Áshimov pen M.Saǵdıevtiń qyzy Ǵalııa Saǵdıeva osy istiń basy-qasynda júrgen, jaqsy iske muryndyq bolǵan aımaq basshysy Málik Myrzalınge aq alǵysyn aıtyp, ákeleriniń esiminiń el esinde saqtalýy onyń urpaǵy úshin ǵana emes, barsha qazaq halqy úshin qýanysh ekendigin aıtty.
Maqtaı Saǵdıev 1929 jyly 12 mamyrda Soltústik Qazaqstan oblysynda dúnıege kelgen. Semeı pedagogıka ınstıtýty men Almaty joǵary partııa mektebin bitirgen Maqtaı Saǵdıev 1971-1983 jyldar aralyǵynda Torǵaı, Qostanaı oblystyq atqarý komıtetterinde tóraǵa orynbasary, Qazaq SSR balyq sharýashylyǵynyń mınıstri, Kókshetaý oblystyq kompartııa komıtetiniń birinshi hatshysy laýazymdaryn atqardy. Qazaqstan kompartııasy ortalyq komıtetiniń múshesi, Qazaq SSR joǵary keńesi prezıdıýmynyń tóraǵasy bolyp saılandy.
1991 jyldan bastap «Qazaqstan Respýblıkasynyń ardagerler keńesi» QB ortalyq keńesiniń tóraǵasy mindetin atqardy. Qazaqstan Respýblıkasy Parlamenti Májilisiniń depýtaty boldy. Sovet Úkimeti men Qazaqstan Respýblıkasynyń birneshe memlekettik nagradalarynyń ıegeri.
Báıken Áshimov 1917 jylǵy 10 tamyzda Aqmola oblysy Rýzaev aýdanyndaǵy Shabaqbaı aýylynda dúnıege kelgen. Ártúrli jyldarda Pavlodar temirjol fabrıka-zaýyt ýchılışesin, Soltústik Qazaqstan oblysyndaǵy Lenın agronomdyq-zootehnıkalyq aýyl sharýashylyǵy tehnıkýmyn, Lenıngrad zoologııa-fıtopatologııa ınstıtýtyn, sondaı-aq SOKP Ortalyq Komıteti janyndaǵy Joǵary partııa mektebin bitirdi.
Báıken Áshimov 1938 jyly Qyzyl Armııa qataryna shaqyryldy. Soltústik-Batys, Batys, I-Belarýs maıdanynda soǵysqa qatysyp, Varshava úshin shaıqasty, eki ret aýyr jaraqat aldy.
Soǵystan keıingi jyldary B.Á.Áshimov Kókshetaý oblysyndaǵy Aıyrtaý aýdandyq atqarý komıtetiniń hatshylyǵynan oblystyq partııa komıtetiniń ekinshi hatshysyna deıin ártúrli qyzmette boldy. Qaraǵandy oblystyq atqarý komıtetiniń tóraǵasy, Qazaqstan Kompartııasy Taldyqorǵan oblystyq komıtetiniń birinshi hatshysy bolyp saılandy. QR Mınıstrler Keńesiniń tóraǵasy, Joǵarǵy Keńesi Tóralqasynyń tóraǵasy - KSRO Joǵarǵy Keńesi Tóralqasy tóraǵasynyń orynbasary, SOKP Ortalyq Komıtetiniń múshesi, VIII jáne IX shaqyrylǵan KSRO Joǵarǵy Keńesiniń depýtaty boldy. Sotsıalıstik Eńbek Eri ataǵynyń ıegeri, 4 ret Lenın ordenimen, basqa da ordendermen jáne medaldarmen marapattalǵan.
