Kókshetaý «Qazaqstannyń 2021 jylǵy mádenı astanasy» atandy
Sharaǵa Qazaqstan Respýblıkasynyń Mádenıet jáne sport mınıstri Aqtoty Raıymqulova, Aqmola oblysy ákiminiń orynbasarlary Málgájdar Tátkeev pen Aına Mysyrálimova, otandyq jáne halyqaralyq sarapshylar, mádenıet salasynyń jáne teatr qaıratkerleri qatysty.
Osy rette, Aqtoty Raıymqulova festıvaldiń uıymdastyrý komıtetiniń sheshimimen Kókshetaý tuńǵysh ret «Qazaqstannyń 2021 jylǵy mádenı astanasy» dep jarııalanǵan atap ótti. Bul óz kezeginde mádenı astana mártebesi berilgen óńirdiń mádenıet jáne óner salasyndaǵy qol jetkizgen jetistikteri men ozyq tájirıbesin is júzinde ózge óńirlermen bólisýge múmkindik beredi.
«Rýhanı qazyna» festıvali, bul – óner men mádenıet merekesi. Siz ben bizge ortaq qýanysh. Osyǵan deıin ár óńirde bastalǵan baıqaý birneshe kezeńnen ótip, qorytyndy mejege jaqyndady. Eń basty maqsat – úzdik qyzmetkerler men uıymdardy anyqtap qoıý ǵana emes, olardyń ózara tájirıbe almasyp, jańa sapaǵa kóterilý úshin birlese qyzmet etýine múmkindik syılaý. Olaı bolsa, Festıval óz maqsatyn oryndap, bárimiz úshin nátıjeli bolady degen senim bildiremin!», – dedi Aqtoty Raıymqulova.
Shara barysynda Aqmola oblysynyń 10 mádenıet qyzmetkerine Mádenıet jáne óner salasy qyzmetkerleri kúnine oraı «Mádenıet salasynyń úzdigi», «Qurmet gramotasy», «Alǵys hat» tapsyryldy.
Aıta keteıik, Mádenıet jáne sport mınıstrligi men Aqmola oblysy ákimdigi arasynda atalmysh jyldy iske asyrý jónindegi is-sharalardyń jol kartasy ázirlenip, bekitildi. Osy josparǵa sáıkes, mádenı, kontserttik, mýzeı jáne kitaphana salalarynda birqatar mádenı sharalar ótkizilýde.
«Rýhanı qazyna – 2021» festıvali Aqmola oblysynda úsh kúnge deıin jalǵasady.
