Kókshetaý qalasynyń turǵyny Kýlagınnen panasyz janýarlarǵa turaq ashyp berýdi surady
KÓKShETAÝ. QazAqparat-Aqmola oblysynyń ákimi Sergeı Kýlagın jeke máseleleri boıynsha azamattardy qabyldady. Máselelerdiń deni áleýmettik jáne kommýnaldyq salalardy qamtydy, dep habarlaıdy «QazAqparat» HAA-nyń óńirlik tilshisi oblys ákiminiń baspasóz qyzmetine silteme jasap.
Qabyldaýda Kókshetaý qalasynyń turǵyny, «Spastı jızn» janýarlar quqyn qorǵaý» qoǵamdyq birlestiginiń tóraıymy Marına Rybalko óńir basshysynan panasyz júrgen janýarlarǵa turaq ashý úshin memleket tarapynan bos ǵımarat berýdi nemese turaq salýǵa jer telimin bólýdi suraı kelipti. Oblys ákimi janýarlar taǵdyryna alańdaǵan Marınanyń oıyn qoldaıtynyn bildirdi. Biraq ta dál búgingi kúni osy maqsatqa saı qalada bos turǵan ǵımarattyń joq ekendigin aıtyp túsindirdi.
«Bul bir kúnde sheshile salatyn másele emes, jan-jaqty qarastyrý kerek. Bolashaqta bul másele baqylaýda bolady, múmkindiginshe kómek kórsetiledi», - dedi ákim.
Al, Eńbekshilder aýdanynyń turǵyny Ilııas Ádilbaev aımaq basshysyna óziniń 2 toptaǵy múgedek qaryndasynyń ótinishin jetkizdi. Úsh balasy bar, jalǵyzbasty ana N. Ádilbaeva kópten beri aýdan ortalyǵynan úı ala almaı júrgen kórinedi. Ol pəter kezegine 38-shi bolyp tirkelgen. Aǵymdaǵy jyly oǵan aýdan ákimdigi bir bólmeli páter usynǵan, biraq ol otbasy músheleriniń bir bólmege syımaıtyndyǵyn aıtyp, bas tartypty. Óńir basshysy ótinish ıesin muqııat tyńdap bul másele tek zań sheńberinde sheshiletindigin aıtty. «Búgingi kúni Eńbekshilder aýdanynda memlekettik baǵdarlama aıasynda kópqabatty turǵyn úı salynýda. Sol úı mejeli ýaqytta salynyp bitse, keler jyly páterli bolyp qalýlaryńyz múmkin. Sol kezde N. Ádilbaevanyń densaýlyǵynyń joqtyǵy, jalǵyz óziniń kámelet jasyna tolmaǵan úsh balany asyrap otyrǵandyǵy mindetti túrde eskeriledi», - dedi óńir basshysy.
Sondaı-aq osy kúni Astana qalasynan kelgen «SK BIP Astana» JShS basshysy Denıs Zaıtsev te qabyldaýda boldy.Ol aımaq basshysyna óziniń «Qalany jaryqtandyrý, abattandyrý» jobasyn usyndy.
Jalpy kezdesý qorytyndysy boıynsha barlyq kelýshilerdiń ótinishteri boıynsha tıisti sala basshylaryna eskertýler men tapsyrmalar berildi.
