Kókshetaý qalasynyń turǵyndary eki kúnnen beri sýsyz otyr
KÓKShETAÝ. QazAqparat – Kókshetaý turǵyndaryn sýsyz qaldyrǵan 800 mıllımetrli KNS 2 káriz qubyryn qalpyna keltirý jumystary jalǵasýda, dep habarlaıdy QazAqparat tilshisi.
Aıta keteıik, «Kókshetaý sý arnasy» kommýnaldyq kásiporny áleýmettik jelidegi paraqshasynda oblys turǵyndaryn aqpannyń 24-i kúngi keshki saǵat 20:00-den bastap, 25-shi aqpan kúngi saǵat 14:00-ge deıin qala boıynsha sý berý ýaqytsha toqtatylatynyn eskertken bolatyn. Keıin bul ýaqyt keshki 20:00-ge deıin uzartyldy. Alaıda, saǵat 20:00-de de sý berilmedi. Qazirgi kezde, qala dúkenderindegi býtılendirligen sýǵa degen suranys joǵary. Tipti, keıbir dúkenderden 5 lıtrlik sýdy izdep tabý qıyn. Turǵyndar jappaı satyp alýda. WhatsApp messendjeri arqyly Kókshetaýda sýdyń beriletin ýaqyty týraly túrli áńgimeler tarap jatyr.
Kókshetaý qalalyq ákimdigindegiler túsindirgendeı, apat aqpannyń 24-inde túngi saǵat 00:30-da oryn alǵan.
«Aqpannyń 24-inde Beıbitshilik (Mır) kóshesiniń boıynda dıametri 800 mıllımetrli KNS 2 qubyry jaryldy. Uzaq ýaqyt (1978 jyly salynǵan) kárizdik kollektorlardy paıdalanǵandyqtan qubyr maıysqan. Qazirgi kezde «Kókshetaý sý arnasy» kommýnaldyq kásipornynan 25 adam men 10 arnaıy tehnıka, Aqmola oblystyq TJD jeke quramynan 8 qyzmetker men 4 tehnıka jumyldyrylyp, qalpyna keltirý jumystaryn júrgizýde. WhatsApp messendjeri arqyly tarap jatqan aqparatqa senbeńizder. Barlyq resmı aqparat @7162akimdigi paraqshasynda jarııalanady», - dep atap ótti Kókshetaý qalasy ákimdiginiń baspasóz qyzmeti Instagram paraqshasynda.
