Kókshetaý qalasynyń ákimi JEO qurylysy týraly aıtty
KÓKShETAÝ. QazAqparat – Qazirgi tańda Kókshetaý qalasynda JEO qurylysy jobasyn júzege asyrý respýblıkalyq deńgeıde qolǵa alynýda. Bul týraly jýrnalıstermen ótken brıfıngte oblys ortalyǵynyń ákimi Baýyrjan Ǵaısa málim etti, dep habarlaıdy QazAqparat tilshisi.
Qala basshysynyń aıtýynsha, jylýmen jabdyqtaý sapasyn jaqsartý úshin bıylǵy jyly Kókshetaýda Áshimov-Ǵabdýllın kóshelerinen Sátbaev kóshesine deıin, Áýezov-Ǵabdýllın kóshelerinen Táshenov kóshesine deıin dıametrin ulǵaıta otyryp, jylý magıstralin qaıta jańartý jobalary josparlanǵan. Osy jobalardy iske asyrý aıasynda qubyrlardy jer asty tartý qarastyrylǵan, bul qalanyń sáýlet kelbetin edáýir jaqsartady.
«JEO qurylysy ózekti bolyp otyr. QR Premer-Mınıstriniń 2021 jylǵy 29 qazandaǵy tapsyrmasyna sáıkes Kókshetaý qalasynda JEO salý jobasyn odan ári iske asyrý respýblıkalyq deńgeıde júrgizilýde. QR Energetıka mınıstrligi múddeli organdarmen birlesip vedomstvoaralyq komıssııa qurdy, jobany iske asyrý boıynsha Jol kartasy ázirlendi. Qazirgi ýaqytta QR Energetıka mınıstrligi «Elektr energetıkasy týraly» QR Zańynyń 15-6 - babyna sáıkes tender ótkizý máselesin pysyqtaýda, bul atalǵan jobany iske asyrý merzimin aıtarlyqtaı tómendetýi múmkin», - dep atap ótti qala ákimi.
Budan basqa, qala turǵyndaryn sapaly aýyz sýmen qamtamasyz etý úshin Kókshetaýda «ónimdiligi táýligine 30000 tekshe metr sý tazartý qurylystaryn qaıta jańartý jáne keńeıtý» jobasy júzege asyrylýda. Transformatorlyq qosalqy stantsııa, jylytý qubyrlary, qabyrǵa panelderi satyp alyndy, transformatorlyq qosalqy stantsııanyń irgetasyn ornatý boıynsha jumystar oryndaldy. Sondaı-aq ǵımarattyń irgetasyn ornatý jáne qabyrǵa panelderin montajdaý boıynsha jumystar aıaqtaldy.
