Kókshetaý qalasynda basketboldan áıelder arasynda «A» dıvızıony boıynsha QR Chempıonatynyń kezekti oıyndary ótýde
KÓKShETAÝ. QazAqparat - Búgin jergilikti Kókshetaýdyń «Oqjetpes» komandasy Astananyń «Tıgryna» qarymta oıyn ótkizdi. Alma-kezek shabýylmen ótken kezdesýde astanalyq qyzdardyń baǵy basym boldy.
Ásirese, tartysty oıynnyń alǵashqy kezeńderinde jaqsy oıyn órnegin kórsetken kókshetaýlyqtar sońǵy sátte qarsylastaryna ese jiberip aldy. Nátıjesinde kezdesý qorytyndysy 52:61 esebimen qonaqtardyń paıdasyna sheshildi. Osylaısha, alań ıeleri oılamaǵan jerde qarymta oıynda upaı joǵaltyp aldy.
Eske sala ketsek, keshe «Oqjetpes» pen «Tıgr» Kókshetaýda alǵashqy kezdesýin ótkizgen bolatyn. Onda alań ıeleri qonaqtarǵa des bermeı, 82:78 esebimen basym tústi. Búgin qonaqtar sol jibergen eseni qaıtaryp aldy.
Endi, týrnır kestesine sáıkes naýryzdyń 29 jáne 30 kúnderi «Oqjetpes» óz alańynda Pavlodardyń «Ertisine» qarsy qos oıyn ótkizbek.
