Kókshetaý qalasyna kireberis joldarǵa sanıtarlyq postar qoıylady
KÓKShETAÝ. QazAqparat - Aqmola oblysynyń ákimi Ermek Marjyqpaev aqmolalyqtar arasynda, onyń ishinde Kókshetaý qalasynda koronavırýs ınfektsııasyn juqtyrǵandardyń sany kúrt óskenin atap ótti. Aımaq basshysynyń aıtýynsha, dertpen kúresý úshin Kókshetaý qalasyna kireberis joldarǵa amalsyzdan sanıtarlyq postar qoıylady, dep habarlaıdy QazAqparat tilshisi.
«Ókinishke qaraı, Kókshetaý qalasynda sońǵy aptada syrqattanǵandardyń sany eki ese ósti. Sol sebepti, biz muqııat bolyp, maska rejımin, áleýmettik qashyqtyqty saqtaýymyz kerek. Barlyǵy ózimizge baılanysty», - dep atap ótti aımaq basshysy E.Marjyqpaev.
Ótken juma kúni Aqmola oblysyna jumys saparymen kelgen Memleket basshysyna jańa juqpaly aýrýlar aýrýhanasy tanystyryldy. Atalmysh medıtsınalyq mekeme osy aptada jumysyn bastaıdy. Koronavırýs ınfektsııasynyń ekinshi tolqynyna daıyndyqty sóz etken aımaq basshysy ókpeni jeldetý aparatynyń jetkilikti kólemde satyp alynǵandyǵyna toqtaldy. Naýryz-qarasha aılary aralyǵynda barlyǵy 325 apparat satyp alyndy. Sonymen birge, rengent apparaty jáne jyljymaly keshen satyp alynýda.
«Biz dári-dármektiń eki aılyq qoryn jasadyq. Dáriler medıtsınalyq mekemeler men dárihanalarda da jetkilikti. Biraq ta, ózimizge ózimiz janymyz ashymasaq, bizge eshteme kómektespeıdi», - dep tolyqtyra kele, E.Marjyqpaev aqmolalyqtardy maska rejımin saqtaýǵa, sondaı-aq, meıramahanalar men toıǵa barmaýǵa shaqyrdy.
«Ókinishke oraı, sandar kóńil kónshitpeıdi. Qazan aıynda 256 adam aýyrsa, onyń 65 paıyzy oblys ortalyǵynyń úlesinde. Sol sebepti, búginnen bastap, memlekettik bas sanıtarlyq dáriger karantındik sharalardy kúsheıtý týraly qaýlyǵy qol qoıady. Osyǵan oraı, qala syrtynda sanıtarlyq blokpostar qoıylady. Bul amalsyzdan baryp otyrǵan shara, budan biz qutyla almaımyz. Saýda oryndary, meıramhanalar jáne oqý oryndarynyń jumysyn qaıta qarap jatyrymyz», - dedi E.Marjyqpaev.
Aımaq basshysy turǵyndardyń saqtyq sharalaryna salǵyrt qarap otyrǵandyǵyna alańdaýshylyq bildirdi. Mysal retinde, Semızbaı kenshindegi 500 jumysshynyń 46 koronavırýske shaldyǵýyna baılanysty, tutas kásiporyndy jabýǵa týra kelgendigin aıtty.
