Kókshetaý qalasy turǵyndarynyń 53 paıyzyn áıelder quraıdy
KÓKShETAÝ. QazAqparat - Kókshetaý qalasyndaǵy jergilikti turǵyndardyń 53 paıyzyn qyz-kelinshekter quraıdy. Bul týraly Aqmola oblysy ákiminiń orynbasary Aına Mysyrálimovanyń qatysýymen ótken oblys ákiminiń janyndaǵy áıelder isteri jáne otbasylyq-demografııalyq saıasat jónindegi komıssııasynyń kezekti otyrysynda aıtyldy, dep habarlaıdy QazAqparat tilshisi.
Keńes barysynda genderlik saıasatty ilgeriletý jóninde alǵa qoıylǵan mindetter saralandy. Otyrysta Aına Ermekqyzy Elbasy N.Nazarbaevtyń «Bolashaqqa baǵdar: rýxanı jańǵyrý» baǵdarlamalyq maqalasynda aıtylǵan mańyzdy mindetterdi saralap aıta kelip, alda atqarylýǵa tıisti mańyzdy isterge toqtaldy.
«Qazirgi tańda áıelder saıasatta, bızneste, ekonomıkanyń barlyq salalarynda er azamattarmen qatar eńbektenip, qabilet darynymen, iskerligimen kózge túsip qana qoımaı, memleketimizdiń ósip-órkendeýine óz úlesterin qosýda», - dedi ol óz sózinde.
Jıynda memlekettik organdardyń strategııalyq josparlarynyń genderlik aspektileri, óńir halqynyń reprodýktıvti densaýlyǵyn saqtaý baǵytynda qoldanylyp jatqan sharalar men kásipker-áıelderdi qoldaý, názikjandylardy zorlyq-zombylyqtan qorǵaý máseleleri qaraldy.
Otyrysta Kókshetaý qalasy ákiminiń orynbasary Altynaı Ámirenovanyń, oblystyq densaýlyq saqtaý basqarmasynyń basshysy Sáýle Qısyqova, oblystyq kásipkerlik jáne ónerkásip basqarmasy basshysynyń mindetin atqarýshy Doshan Ámirenov jáne oblystyq ishki ister departamentiniń aǵa ınspektory Asylgúl Syzdyqovanyń genderlik saıasat boıynsha atqarylyp jatqan naqty isteri týraly baıandamalary tyńdaldy.
Áleýmettik saladaǵy mańyzdy jumystardy júzege asyrý maqsatynda qurylǵan óńirimizdegi 290 úkimettik emes uıymdardyń 70 paıyzyn áıelder basqarady eken. Kókshetaý qalasyndaǵy jergilikti turǵyndardyń 53 paıyzyn qyz-kelinshekter quraıdy. Qazirgi tańda oblys ortalyǵyndaǵy shaǵyn jáne orta bıznes salasynyń 30 paıyzy názik jandylardyń úlesinde.
Alaıda, otbasynda zorlyq-zombylyq kórip, taǵdyrdyń taýqymetin tartyp júrgender de az emes. Máselen, ústimizdegi jyldyń ózinde Kókshetaý qalasynda áıelderge zorlyq-zombylyq kórsetýdiń 220 faktisi tirkelip otyr. Onyń ishinde jan túrshiktirer derekter de kezdesedi. Sol sebepti oblysta áıelderdi qıyndyqtan arashalap alý úshin «Daǵdarys» ortalyqtary ashylady dep josparlanýda.
