Kókshetaý qalasy aldaǵy jylý berý maýsymyna tolyq ázir

KÓKShETAÝ. QazAqparat - Kókshetaý qalasy aldaǵy jylý berý maýsymyna tolyq ázir. Bul týraly «QazAqparat» HAA-niń tilshisine «Kókshetaý Jylý» memlekettik kommýnaldyq kásipornynyń óndiristik-tehnıkalyq qyzmet bólimi basshysynyń orynbasary Erjigit Túnqatarov aıtty.

Onyń sózine qaraǵanda, qaladaǵy bilim salasynyń barlyq nysandary jylý maýsymyna 100 paıyz daıyn. Munda ýaqytynda tender ótkizilip, jóndeý jumystary júrgizilgen. Jylý qubyrlary synaqtan ótkizilip, jýylypty. Qaladaǵy barlyq mektepter men balabaqshalardyń jylý júıesine eseptegish aspap ornatylǵan. Máselen, bıyl №3 jáne №14 orta mektepterdiń jylý júıeleri kúrdeli jóndeýden ótkizilikti.

«Aldyńǵy jyly kóshe boıyndaǵy jylý qubyrlaryn aýystyrǵan kezde gıdravlıkalyq tártip buzylyp, oblystyq aýrýhana jylýmen durys qamtamasyz etilmedi. Bul baǵytta birshama jumys atqaryldy. Búgingi tańda densaýlyq saqtaý jáne mádenıet salasynyń nysandary jylý berý maýsymyna 100 paıyz jáne qaladaǵy 833 turǵyn úıdiń 86 paıyzy daıyn»,- dep atap ótti Erjigit Túnqatarov.

Sonymen qatar, oblys ortalyǵyndaǵy barlyq sý sorǵysh stantsııalary da jylý berý maýsymyna deıin jóndelip bitpek.

«Bekitilgen josparǵa sáıkes, jylý kózderi men jylý qubyrlary júıesin jylý berý maýsymyna daıyndaý jumysyn aıaqtap kelemiz. Jylý kózderi boıynsha 6 bý qazandyǵy daıyn. Eki bý qazandyǵy agregatynyń jóndeý jumysy aıaqtalýǵa jaqyn. Búgingi kúni qorda 12 myń tonna kómir men 150 tonna mazýt bar. Bul otyn 20 kúnge jetedi. Kómir tasymaldaýǵa kelisim-shart jasalǵan. Kúz jáne kóktem aılarynda kómir az jaǵylady.

Jylý berý maýsymynda kúnniń sýyqtyǵyna jáne jumys istep turǵan bý qazandyǵy agregattarynyń qýatyna baılanysty otyn qoryn qaıtadan sanaımyz. Sóıtip, ótken jylǵy jylý berý maýsymynda mazýtty únemdedik. Birinshi qazannan bastap 708 tonna mazýt tasymaldanady.

Búgingi tańda №1 aýdandyq bý qazandyǵyndaǵy bes qazandyq pen sý sorǵysh agregattary aǵymdaǵy jóndeýden ótti. Mundaǵy jalpy stantsııalyq qondyrǵyǵa da aǵymdaǵy jáne kúrdeli jóndeý júrgizilgen. №2 aýdandyq bý qazandyǵyndaǵy eki qazandyq agregaty men jalpy stantsııalyq qondyrǵysynyń jóndeý jumystary aıaqtalýǵa jaqyn. Al SES, Krasnoıar selosy men Stantsıonnyı kentindegi bý qazandyqtary tolyq jóndeldi. Jalpy, qala qysqy jylý berý maýsymyna tolyqtaı ázir deýge bolady», dep sózin qorytty E.Túnqatarov.