Kókshetaý qalasy men Zerendi týrıstik aımaǵyn jalǵaıtyn jol úsh jolaqty bolady

ASTANA. KAZINFORM - Bıyl mamandar jalpy uzyndyǵy 50 shaqyrymǵa jýyq respýblıkalyq mańyzy bar «Kókshetaý – Zerendi» avtojolyn ortasha jóndeý jumystarymen qamtýǵa kiristi. Jobany kelesi jyly aıaqtaý josparlanǵan.

Kólik mınıstri Marat Qarabaev jóndeý jumystarynyń barysyn tekserdi.

«Zerendi – bizdiń elimizdegi tanymal týrıstik oryndardyń biri. Tıisinshe, jazǵy maýsymda atalǵan ýchaskede qozǵalys kúsheıedi. El turǵyndary men týrıster úshin mańyzdy atalmysh jol 2025 jyly úsh jolaqty bolady. Eki jolaq bir baǵytta, al qalǵan bireýi kerisinshe baǵytta bolmaq. Eki jolaqtyń qaı baǵytta paıdalanylatyndyǵy týraly sheshim jergilikti polıtsııamen birlesip qabyldanady. Atalǵan jolda reversıvti qozǵalys bolady. Eger buryn joldyń eni 7 metr bolsa, endi ol 11 metrge deıin jetkizilmek. Keńeıtilgen jol kólikterdiń qozǵalysy úshin qolaıly jaǵdaılardy qamtamasyz etedi dep kútilýde. Sondaı-aq joldyń ótkizý qabiletin arttyrýǵa jáne keptelisterdi aıtarlyqtaı azaıtýǵa múmkindik beredi», - dedi mınıstr.

Nysandy paıdalanýǵa bergennen keıin mamandar jol qaýipsizdigi úshin qajetti elementterin ornatady.

Qazir Zerendi aýylynan joldyń ortasyna deıingi 20 shaqyrymdyq ýchaskede (bul ekinshi ýchaske) ortasha jóndeý boıynsha jumystar júrgizilýde. Atalǵan ýchaskede mamandar asfalttyń eki qabatyn tósep, jol jıekterin nyǵaıtýda. Sonymen qatar qalǵan segmentti (birinshi ýchaskeni) jóndeıtin merdiger uıymdy anyqtaý boıynsha jumystar júrgizilip jatyr.