Kókshetaý qalasy men 9 aýdanda zańdastyrylǵan qoqys polıgony múldem joq
Jyl basynan Aqmola oblysynda 820 beıbereket qoqys orny anyqtaldy. Ekologııa departamenti men quzyrly organdar mamandarynyń aralasýymen 257-si joıyldy. Birqatar qala men aýdanda qatty turmystyq qaldyqtardy tógetin zańdastyrylǵan polıgondar múldem joq, dep habarlaıdy QazAqparat tilshisi.
Ekologııa departamenti baspasóz qyzmetiniń málimetinshe, búgingi tańda Aqmola oblysynda beıbereket qoqys úıindileriniń qalyptasýy ózekti máselege aınalyp otyr. Buǵan jergilikti atqarýshy organdar baqylaýynyń jetkiliksizdigi, polıgondarda kommýnaldyq qaldyqtardy jınaý, tasymaldaý, ornalastyrý boıynsha qajetti ınfraqurylymnyń bolmaýy sebep.
Atalǵan departament ruqsat etilmegen qoqys úıindilerin anyqtaý maqsatynda «Qazaqstan ǵarysh sapary» UK» AQ-nyń kómegimen ǵaryshtan monıtorıng alyp otyrady.
«Sonyń nátıjesinde bıylǵy jyl basynan óńirde ruqsat etilmegen 820qoqys úıindisi anyqtaldy. Onyń 257-in Ekologııa departamenti men aýdan ákimdikteri birlesip joıdy. Osy baǵytta jergilikti atqarýshy organdarmen jáne jergilikti polıtsııa qyzmetimen ózara is-qımyl únemi júzege asyrylyp keledi. Bıyl aýdandar men aýyldyq okrýgterdiń ákimdikterimen ruqsat etilmegen qoqys úıindilerin joıý jáne qatty turmystyq qaldyqtar polıgondaryn zańdastyrý taqyryby boıynsha 4 keńes ótkizildi. Ákimdikterge ruqsat etilmegen qoqys úıindilerin joıý qajettiligi týraly 20-dan astam hat joldandy. Sonymen qatar bıyl beıbereket polıgondardy joıý boıynsha sharalar qabyldamaǵany úshin 2 laýazymdy tulǵa (Tselınograd aýdany ákiminiń orynbasary, Arshaly aýdanynyń bólim basshysy), 4 jeke tulǵa ákimshilik jaýapkershilikke tartyldy», –dedi vedomstvodan.
Oblys aýmaǵyndaǵy polıgondarda qatty qaldyqtardyń negizgi bóligin ónerkásiptik qaldyqtar quraıdy. 2023 jyldyń birinshi jartyjyldyǵynda onyń kólemi 653,3 myń tonnany qurady. Aqmola oblysynyń kásiporyndary jalpy jınaqtalǵan ónerkásiptik qaldyqtyń 9,9 paıyzyn nemese 10,7 myń tonnasyn ǵana kádege jaratyp otyr.
«Jergilikti atqarýshy organdardyń qatty turmystyq qaldyqtar polıgondaryna ekologııalyq ruqsat berý qujattaryn resimdeý jumystary sylbyr. Buǵan qosa, jobalyq qujattamanyń quny qymbat. Al bul óz kezeginde bıznes sýbektileriniń, bıýdjettik uıymdardyń jáne jalpy halyqtyń jaǵdaıyn qıyndatyp otyr. Búgingi tańda oblys aýmaǵynda qatty turmystyq qaldyqtardyń 130 úıindisi bar, olardyń tek 24-i ǵana zańdastyrylǵan. Kókshetaý qalasy men Aqkól, Arshaly, Bulandy, Býrabaı, Birjan sal, Egindikól, Zerendi, Qorǵaljyn, Tselınograd aýdandarynda birde-bir zańdastyrylǵan qoqys polıgony joq», –dep qosty vedomstvodan.
Aıta ketsek, budan buryn ruqsat etilmegen jerge qoqys tókkeni úshin salynatyn aıyppul ósetinin jazǵan edik.
