Kókshetaý qalalyq soty ákimshiligi basshysynyń ólimi boıynsha qylmystyq is qozǵaldy
ASTANA. KAZINFORM — Marqumnyń týystary bolǵan oqıǵanyń barlyq mán-jaıyn jan-jaqty ári obektıvti tekserýdi talap etip otyr, dep habarlaıdy Kazinform tilshisi.
Kókshetaýda polıtsııa qalalyq sot ákimshiliginiń basshysy, 27 jastaǵy Aıan Dúısekovtiń ólimine baılanysty QR Qylmystyq kodeksiniń 105-baby – «Ózin-ózi óltirýge deıin jetkizý» boıynsha sotqa deıingi tergeý júrgizip jatyr.
— Qazirgi ýaqytta qajetti tergeý amaldary júrgizilip, bolǵan oqıǵanyń barlyq mán-jaıy anyqtalyp jatyr. Tergeý múddesine baılanysty ózge aqparat jarııalanbaıdy, — dep habarlady Aqmola oblysy polıtsııa departamentiniń baspasóz qyzmeti.
Marqumnyń týystary oqıǵanyń barlyq mán-jaıyn jan-jaqty, obektıvti ári táýelsiz tekserýdi, sondaı-aq árbir laýazymdy tulǵanyń áreketine baǵa berýdi talap etip otyr.
Otbasynyń aıtýynsha, Aıanǵa turaqty túrde moraldyq jáne psıhologııalyq qysym kórsetilgen. Týystarynyń aıtýynsha, Aıanǵa óz mindetin qalypty atqarýyna kedergi keltirilgen. Sondaı-aq, otbasynyń pikirinshe, oǵan ádiletsiz tártiptik jaza qoldanylǵan.
Sonymen qatar, Aıan qyzmettik páterde birneshe aı ǵana turǵan. Keıin ony májbúrlep shyǵarý máselesi kóterilgen.
Aıannyń artynan áıeli men eki kishkentaı balasy qaldy.
Buǵan deıin Qurt laqap atymen belgili reperdiń ústinen qylmystyq is qozǵalǵany belgili boldy.
