Kókshetaý irgesindegi óndiristik tseh ǵımaraty órtke orandy
KÓKShETAÝ. QazAqparat - Kókshetaý qalasynan 20 shaqyrym jerdegi Stantsıonnyı kenti (Kókshetaý-2) aýmaǵyndaǵy «Kokshe Eko tara» JShS-niń bir qabatty ǵımaraty órtke orandy, dep habarlaıdy QazAqparat tilshisi QR ІІM TJK resmı ókili Rýslan Imanqulovqa silteme jasap.
20 mamyr kúni saǵat 20:06 shamasynda Kókshetaý qalasynan 20 shaqyrym jerdegi Stantsıonnyı kenti (Kókshetaý-2) aýmaǵyndaǵy «Kókshe Eko tara» JShS-niń bir qabatty ǵımaratynyń (karton qorap shyǵaratyn óndiristik tsehy) shatyrynan órt shyqty.
Aldyn ala məlimetter boıynsha órt 250 sharshy metr aýmaqty sharpydy. Qurban bolǵandar men zardap shekkender joq. Órt sóndirý jumystary jalǵasýda.
"Tilsiz jaýdy aýyzdyqtaýǵa TJD jeke quramynan 25 qyzmetkeri men 6 arnaıy órt sóndirý tehnıkasy jumyldyryldy", dep kórsetilgen Imanqulovtyń habarlamasynda.
Eske sala keteıik, sonymen qatar, búgin saǵat 12:35-te Kókshetaý qalasynyń Ábilqasymov kóshesi, 95 «A» mekenjaıynda ornalasqan eki qabatty «Trıýmf» saýda úıiniń shatyry men qabyrǵasynyń syrtqy qaptamasy órtke oranǵan bolatyn. TJK deregi boıynsha jalyn 13:05-te aýyzdyqtalyp, 13:22-de tolyqtaı sóndirildi.
