Kókshetaý irgesindegi aýyl turǵyndaryna jyljymaly medıtsınalyq keshen kómek kórsetýde

KÓKShETAÝ. QazAqparat - Qarttar aılyǵy aıasynda Kókshetaý qalasyna qarasty Krasnoıar kentindegi alǵashqy medıtsınalyq-sanıtarlyq kómek ortalyǵy dárigerleri aktsııa ótkizdi. Onyń barysynda kenttiń shetki aýdandaryndaǵy turǵyndar jyljymaly medıtsınalyq keshende medıtsınalyq tekserýden ótti, dep habarlaıdy QazAqparat tilshisi.

Atalmysh ortalyqtyń aǵa medbıkesi Gúlnar Bókeshovanyń aıtýynsha, keıbir naýqastardyń medıtsınalyq tekserýden ótip, dárigerdiń kómegine ýaqtyly júginýge múmkindigi bola bermeıdi. Ásirese, jergilikti óndiris oryndary men mekemelerdiń qyzmetkerleriniń jumystan qoly bosamaıdy. Sol sebepti, jyljymaly keshen turǵyndarǵa ózderi shyǵyp otyr.

«Jyljymaly medıtsınalyq keshende bizde tekserýge barlyq jaǵdaı jasalǵan. Biz Krasnoıar aýylyndaǵy shujyq tsehyna bardyq, onda kóptegen qyzmetkerler aýysymmen jumys isteıdi jáne emhanaǵa baryp, dárigerge qaralýyna ýaqyttary joq. Sonymen birge, eldi meken aýmaǵynda júrip-turýǵa múmkindigi joq qart naýqastar da bar. Máselen, Nurly kósh aýylynda óziniń felsherlik akýsherlik pýnti bolsa, biz aktsııa aıasynda oǵan barýdy jón dep sheshtik», - dep atap ótti Gúlnar Bókeshova.

Krasnoıar kentindegi alǵashqy medıtsınalyq-sanıtarlyq kómek ortalyǵy dırektorynyń orynbasary Ásel Sepenova atap ótkendeı, turǵyndar terapevt, kardıolog, okýlıst, stomatolog, gınekolog mamandardan keńes ala aldy. Budan bólek, EKG jáne ÝDZ ótti. Sonymen birge, jyljymaly medıtsınalyq keshende tumaýǵa nemese COVID-ke qarsy ekpe salyndy.

Emhanalyq baqylaý keńesiniń tóraǵasy Bazarbaı Ábýov pen Qoǵamdyq keńestiń múshesi Aleksandr Ejov óńirdiń densaýlyq saqtaý basqarmasy men medıtsınalyq-sanıtarlyq kómek ortalyǵynyń basshylyǵyna aktsııa úshin shynaıy alǵysyn bildirdi.

«Memleket basshysy Qasym-Jomart Toqaev óziniń Joldaýynda kópsalaly aýrýhanalardy ashý týraly mindetterdi alǵa qoıǵan bolatyn. Búginde bizdiń jergilikti emhanalarda qajetti mamandar bar. Olar halyqqa qyzmet kórsetýde», - deıdi Aleksandr Ejov.

Osy rette, kásiporyn qyzmetkerleri de dárigerlerdiń kelýine qýanyp otyr.

«Adam balasy úshin eń mańyzdy nárse – ol densaýlyq. Al kásiporyn jumysshylarynyń ýaqytyly dárigerge baryp, kórinip turýlaryna únemi múmkindik bola bermeıdi. Sondyqtan bizge osyndaı keshenniń kelýi mańyzdy. Jylyna keminde bir ret kelip tursa, tamasha bolar edi», - dep qýanyshymen bólisti aýyl turǵyny Natalıa Danıleva.

Aıta ketsek, budan buryn Aqmola oblysynda dáriger tapshylyǵy qalaı sheshilip jatqandyǵy jazǵan edik.