Kókshetaý emhanasy flıýorograf, rentgen-apparat jáne LOR-kombaınymen jabdyqtaldy
KÓKShETAÝ. QazAqparat - Kókshetaý emhanasy flıýorograf, rentgen-apparat jáne LOR-kombaın tárizdi jańa jabdyqtarmen tolyqty, dep habarlaıdy QazAqparat tilshisi Aqmola oblystyq densaýlyq basqarmasynyń baspasóz qyzmetine silteme jasap.
Vedomstvonyń málimetinshe, otandyq «Jeńis» tsıfrly flıýorograf, rentgen-apparat burynǵy 2002 jylǵy apparattyń tozýyna baılanysty satyp alynǵan.
«Jańa jabdyq bas súıegi men keýde kletkasy organdary aýrýyn rengent, flıýorografııa arqyly anyqtaýdy jeńildetedi. Flıýorografııalyq zertteý buryn 10 mınýt bolsa, endi 3 mınýtta qolaıly ári zııansyz júzege asyrýǵa bolady. Apparat kabınasy beınebaqylaý kamerasymen jabdyqtalǵan, bul rengent zerthanashyǵa jumys ornynda otyryp baqylap, basqarýǵa múmkindik beredi», - deıdi bólim meńgerýshisi Álııa Nyǵmetova.
Sonymen qatar, Qazaqstanda shyǵarylǵan «ARTDIAGNOST-8» rengent dıagnostıkalyq kesheni satyp alyndy.
«Onyń burynǵysyn áriptesim 25 jyl (1993 jyldan bastap) qoldandy. Zamanaýı úlgidegi jańa apparat dıagnostıkanyń kóptegen túrin júrgizýge múmkindik beredi. Kópfýnktsıonaldy, yńǵaıly jáne qýatty rengent dıagnostıkalyq keshendi avtomatty túrde basqarýǵa bolady. Kompıýterlik óńdeý sýret beınesin jaqsartady, sonyń nátıjesinde usaq ózgerister anyqtalyp, patologııa qurylymy baǵalanady», - deıdi Aqmola oblystyq densaýlyq saqtaý basqarmasynyń baspasóz hatshysy Fatıma Rossolova.
Eger flıýorograf, rentgen-apparat eski úlgisi emhanada burynnan bolsa, LOR-kombaın tuńǵysh ret jetkizilip otyr.
«LOR-kombaıny arqyly tamaq, muryn jáne qulaq aýrýlaryn erte anyqtap, der kezinde emdeýge bolady», - dep óziniń pikirimen bólisti kópjyldyq tájirıbesi bar lor dárigeri Qanat Esenǵojın.
Apparat adamnyń denesine yńǵaıly bolýy úshin sýdy avtomatty túrde 36,6 gradýs temperatýraǵa deıin jylytady. Endi oblys turǵyndary onyń ıgiligin kóretin bolady.
