«Kókshetaý – Atbasar» jolynyń ýchaskesinde turaqtandyrǵysh «Acrosoil» tehnologııasy synaldy
AQMOLA OBLYSY. QazAqparat - Elimizdiń avtomobıl joldarynda ınnovatsııalardy engizý sharalary jalǵasýda. «Kókshetaý – Atbasar» jolynyń 7+150 – 7+250 shaqyrym ýchaskesinde «Acrosoil» turaqtandyrǵysh qospasy synaldy, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.
Jańa tehnologııany engizý sharalaryn ««QazAvtoJol» UK» AQ men «UneedUs» JShS birlesip júzege asyrýda. «UneedUs» JShS málimetterine sáıkes Acrosoil turaqtandyrǵyshy, tipti joldyń saz balshyqty jer tósemi men negizgi qabattaryn nyǵaıtýǵa múmkindik beredi.
Jer jamylǵysyndaǵy nemese jol tabanyndaǵy topyraq qoparylyp, 1-3% tsement jáne topyraqtyń túrine baılanysty belgili bir mólsherde «Acrosoil» qospasy qosylady da, reısakler arqyly aralastyrylady. Daıyn qospa judyryqshaly katokpen tóselip, avtogreıderdiń kómegimen keskindeledi. Osydan keıin jol jabyny tegis bilikti nemese pnevmodońǵalaqty katokpen tegisteledi.
Dástúrli ádis boıynsha topyraqty nyǵaıtý úshin 6-7% tsement qajet bolsa, «Acrosoil» turaqtandyrǵyshy arqyly ol tek 1-3% mólsherde ǵana jumsalady. Osylaısha atalmysh tehnologııa jumsalatyn materıaldyń kólemin azaıtyp, jol jamylǵysy qurylymynyń ózindik qunyn tómendetýge múmkindik beredi.
Tájirıbelik ýchaskede monıtorıng júrgizilip, tehnıkalyq baqylaýdyń nátıjeleri daıyn bolǵan soń «Acrosoil» tehnologııasyn óndiriske engizý jónindegi sheshim qabyldanbaq.
