«Kókshetaý-Atbasar» tas jolynda jol apatynan 3 adam kóz jumdy
KÓKShETAÝ. QazAqparat - Aqmola oblysynyń «Kókshetaý-Atbasar» tas jolynda birneshe kólik soqtyǵysty. Jol apatynan úsh adam kóz jumdy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, jol apaty búgin saǵat 13:59-da boldy. Bul týraly saǵat 14:10 Atbasar aýdandyq polıtsııanyń kezekshilik bólimine habar tústi.
«Oqıǵa ornyna jetken tártip saqshylary «Vaz2110», «GAZel» jáne «Folksvagen Golf» kólikteriniń soǵylǵanyn anyqtady. Soqydan «GAZel» kóliginiń gazballon qurylǵysy jaryldy. Jol-kólik oqıǵasynan «Folksvagen Golf» kóliginiń júrgizýshisi men eki jolaýshysy oqıǵa ornynda kóz jumdy. Budan bólek, «GAZel» kóliginiń jolaýshysy túrli dene jaraqatymen Atbasar aýdandyq aýrýhanasyna jetkizildi», - dedi vedomstvodan.
Qazirgi kezde, osy oqıǵaǵa baılanysty Qylmystyq kodekstiń 345 babynyń 4 bóligi boıynsha sotqa deıingi tergeý amaldary júrip jatyr.
Eske sala keteıik, sáýirdiń 6-y kúni túngi saǵat 22:00 shamasynda Kókshetaý qalasynda úsh kólik soqtyǵysyp, 42 jastaǵy áıel kóz jumǵan bolatyn.
