Kókshetaý-Astana avtojolynyń zamanaýı dárethanasy nege jabyq tur – Qazavtojol jaýaby
ASTANA. KAZINFORM – «QazAvtoJol» ulttyq kompanııasynyń basqarma tóraǵasy Darhan Imanashev «Kókshetaý-Astana» baǵytyndaǵy aqyly joldyń zamanaýı dárethanasy demalys kúni nege jabyq bolǵanyn túsindirdi.
Ulttyq kompanııa basshysynyń aıtýynsha, Astana men Kókshetaýdyń arasynda tórt jerde zamanaýı dárethana bar ekenin baıandady.
«Jaǵdaı bylaı boldy. Demalys kúnderi joldyń boıynda týrıster óte kóp boldy jáne ájethanalarǵa jıi bara bastady. Sol sebepten tok máselesi týyndap, nasostyń rozetkasy balqyp ketkennen keıin ol ájethana jumys isteı almady. Sol bir saǵattyń ishinde merdiger rozetkany ákelip, aýystyrǵannan keıin nasosty qosty. Sol 40 mınýt, 1 saǵattyń kóleminde jańaǵydaı ajıotaj boldy», - dedi «QazAvtoJol» basshysy Úkimet otyrysynan keıin ótip jatqan baspasóz máslıhatynda..
Sondaı-aq, ol jol boıyndaǵy dárethanalardyń úzdiksiz jumysy birinshi kezekte jolaýshylardyń uqyptylyǵyna baılanysty dep esepteıtinin aıtty.
«Týra osyndaı másele demalys kúnderi Jetisý oblysynda da bolǵan. Paıdalanýshy dárethanaǵa jaıalyq tastaǵan. Sonyń saldarynan bitelip qaldy da, ájethana jarty kún jabyq turdy. Sondaı oqıǵalar kóp bolady. Kóbi paıdalanýshylarǵa baılanysty», - dedi Darhan Imanashev.
Aıta ketý kerek, demalys kúnderi áleýmettik jeli qoldanýshylary Kókshetaý-Astana baǵytyndaǵy aqyly joldyń zamanaýı dárethanasy jabyq turǵanyn aıtyp, shaǵymdanǵan edi.
