Kókshelik aqyn-jazýshylardyń aýdıokitaptary jınaǵynyń tanystyrylymy ótti

KÓKShETAÝ. QazAqparat - Kókshetaý qalasyndaǵy M.Jumabaev atyndaǵy Aqmola oblystyq ámbebap - ǵylymı kitaphanasynda «Rýhanı jańǵyrý» baǵdarlamasyn júzege asyrý aıasynda kókshelik aqyn-jazýshylardyń aýdıokitaptary jınaǵynyń tanystyrylymy ótti, dep habarlaıdy QazAqparat tilshisi.

Igi si Aqmola oblystyq ishki saıasat basqarmasynyń jáne «El Jastar» teatrynyń qoldaýymen «Rýhanı jańǵyrý» aımaqtyq jobalyq keńsesiniń bastamasymen júzege asyryldy. Sharaǵa ǵylymı ıntellıgentsııa, bilim jáne mádenıet ókilderi, sondaı-aq, kitaphana oqyrmandary men stýdentter qatysty.

Aýdıokitaptar jınaǵyna óńirge tanymal aqyn-jazýshylar - S.Júnisovtiń «Aqan seri», І.Esenberlınniń «Qaǵar», E.Myrzahmetovtyń «Medet», E.Asqarovtyń «Ata qaz», Sh.Ýálıhanovtyń «Óli men tiriniń dostyǵy», M.Ǵabdýllınniń epıstolıarlyq álemi, J.Erǵalıevtiń «Eski arba», S.Muqanovtyń «Balýan Sholaq» jáne T.Qajybaıdyń «Aıbozym» tárizdi toǵyz shyǵarmalary endi.

Aýdıokitaptar «jandy daýyspen» oqý arqyly, atap aıtqanda «Zhakondra Films» stýdııasynda «El Jastar» teatrynyń akterleri tarapynan jazyldy.

Bul jobanyń maqsaty qazaqstandyqtardyń jańa býynyn patrıottyq tárbıeleý, qazaq ádebıetine degen qyzyǵýshylyqty arttyrý jáne halyq arasynda oqýdy tanymal etý bolyp tabylady.

«Rýhanı jańǵyrý» aımaqtyq jobalaý keńsesiniń basshysy Qaırat Seıitqazın óz sózinde aýdıokitaptyń jazylýyna bir aı ýaqyt ketkenin aıtty.

Shyǵarmalar tolyq enbegen, tek qana úzindileri jańa aýdıospektal formatynda kásibı óńdelgen. Bul aýdıokitaptardy «Smart Ruhani» veb-saıtynda nemese «Rýhanı jańǵyrý Aqmola oblysy» telegramm-arnasynda tegin tyńdaýǵa jáne kóshirip alýǵa bolady.

Sondaı-aq, Qaırat Seıitqazın 2020 jyly respýblıkalyq aqyndar men jazýshylardyń shyǵarmalaryn jazý josparlanyp otyrǵanyn atap ótti.