Kókshede mádenı maýsymashar: fılarmonııanyń 80 jyldyǵy atap ótildi
KÓKShETAÝ. KAZINFORM – Sal-serilerdiń áni men jyryna, kúıi men ónerine kýá bolǵan Kókshe tórinde mádenı maýsymashardyń onkúndigi bastaldy. Aıtýly mádenı baǵdarlama Úkili Ybyraı atyndaǵy Aqmola oblystyq fılarmonııasynyń 80 jyldyǵyna arnalǵan birqatar mereıtoılyq sharalarmen bastaý aldy.
Osy aıtýly mereıtoı aıasynda «Taza Qazaqstan — mádenıet keńistiginde» atty respýblıkalyq dóńgelek ústel ótti. Basqosýǵa mádenıet salasynyń qaıratkerleri, respýblıkalyq jáne óńirlik mádenıet uıymdarynyń ókilderi men sala ardagerleri jınalyp, ulttyq mádenıetti saqtaý, ónerdi damytý, rýhanı qundylyqtardy dáripteý jáne mádenıetti qoǵamnyń ajyramas bóligi retinde ornyqtyrý máselelerin talqylady.
Seksen jyl ishinde fılarmonııa sahnasynda dástúrli án men kúı, klassıkalyq mýzyka, horeografııa jáne kásibı sahna óneriniń túrli janrlary kórermenge usynylyp keledi. Óner ordasy Birjan sal, Aqan seri, Úkili Ybyraı syndy Kókshe óneriniń sańlaqtarynan bastaý alǵan dástúrdi jalǵastyryp, ulttyq ónerdi nasıhattaýǵa eleýli úles qosyp keledi.
Mereıtoılyq sharada Qazaqstan Respýblıkasy Prezıdentiniń keńesshisi Málik Otarbaev Memleket basshysy Qasym-Jomart Toqaevtyń ystyq yqylasyn jetkizip, fılarmonııanyń 80-shi kontserttik maýsymynyń ashylýyna oraı ujym ardagerlerin, basshylyǵy men shyǵarmashylyq quramyn quttyqtady.
— Úkili Ybyraı atyndaǵy Aqmola oblystyq fılarmonııasynyń 80-shi kontserttik maýsymynyń ashylýyna oraı ujym ardagerlerin, basshylyǵy men shyǵarmashylyq quramyn shyn júrekten quttyqtaımyn, — delingen quttyqtaýda.
Úkili Ybyraı atyndaǵy Aqmola oblystyq fılarmonııasynyń dástúrli ánshisi Sársenbaı Hasenov fılarmonııanyń 80 jyldyǵy óńirdiń mádenı ómirindegi mańyzdy oqıǵa ekenin atap ótti.
— Fılarmonııanyń 80 jyldyǵy — bir shyǵarmashylyq ujymnyń mereıtoıynan áldeqaıda aýqymdy mánge ıe. Bul — Kókshe óńirindegi kásibı ónerdiń qalyptasýy men damýyn, birneshe býyn ónerpazdyń shyǵarmashylyq jolyn sabaqtastyratyn mańyzdy beles, — dedi ol.
Dóńgelek ústelde «Taza Qazaqstan» bastamasynyń mádenıetpen sabaqtastyǵy da sóz boldy. Aqmola oblysy ákiminiń keńesshisi, jazýshy Jabal Erǵalıev bul bastamanyń qorshaǵan ortanyń tazalyǵymen qatar, adamnyń ishki mádenıeti men rýhanı dúnıesin de qamtıtynyn atap ótti.
«Taza Qazaqstan» ıdeıasy adamnyń qorshaǵan ortasyna ǵana emes, onyń ishki mádenıeti men rýhanı álemine de qatysty. Osy turǵydan alǵanda, mádenıet pen tazalyq uǵymdary ózara sabaqtasyp jatyr, — dedi Jabal Erǵalıev.
Mereıtoı aıasynda elimizdiń ár óńirinen kelgen qonaqtarǵa Kókshetaýdyń mádenıet jáne óner nysandaryna tanymdyq ekskýrsııa uıymdastyryldy. Qonaqtar óńirdiń mádenı áleýetimen, shyǵarmashylyq ujymdardyń tynys-tirshiligimen tanysty.
Keshke mereıtoılyq baǵdarlama gala-kontsertpen jalǵasty. Sahnada K. Kúmisbekov atyndaǵy qazaq halyq aspaptar orkestri, sımfonııalyq jáne estradalyq-úrlemeli aspaptar orkestrleri, «Gákký» bı ansambli men fılarmonııa solısteri óner kórsetip, kórermenge mazmundy kontserttik baǵdarlama usyndy. Mereıtoılyq keshke arnaıy qonaq retinde Qazaqstannyń halyq ártisi, kúıshi-kompozıtor Seken Turysbek, dástúrli án óneriniń kórnekti ókili Qaırat Baıbosynov, ánshi-kompozıtor Birjan Hasanǵalıev jáne kúıshi-kompozıtor, halyq ártisi Aıtqalı Jaıymov qatysty.
Kókshe tórinde bastalǵan mádenı maýsymashardyń onkúndigi — óńirdiń óneri men rýhanııatyn keńinen tanytyp, mádenı murany dáripteýge baǵyttalǵan aýqymdy sharalar toptamasy. Al Úkili Ybyraı atyndaǵy fılarmonııanyń 80 jyldyǵy — ótkenge taǵzym etip, ulttyq ónerdiń sabaqtastyǵyn aıshyqtaıtyn aıtýly beles.
