Kókshe óńirinde Táýelsizdik kúni merekesine 2500 shara ótedi
KÓKShETAÝ. QazAqparat - Aqmola oblysynda Táýelsizdik merekesine oraı 2500 shara ótkizip, 450 myń adamdy qamtý mejelenip otyr.
Bul týraly aımaq basshysy Málik Myrzalınniń tóraǵalyǵymen ótken kezekti apparat keńesinde aıtyldy, dep habarlaıdy QazAqparat tilshisi ákimdiktiń baspasóz qyzmetine silteme jasap.
Apparat keńesinde kún tártibindegi máseleler boıynsha aldymen 2017 jyldyń 25-30 qarasha kúnderi aımaq basshysy Málik Myrzalın bastaǵan aqmolalyq delegatsııanyń Qytaı eline jasaǵan jumys saparynyń qorytyndysy sóz boldy. Sapar kezinde Hebeı provıntsııasynyń gýbernatory Sıýı Tsınmen ótken kezdesýde ekijaqty birlesip, jumys tobyn quryp, mádenı-tanymdyq baǵdarlama sheńberinde delegatsııa almasý týraly kelisim jasaldy.
Sonymen qatar, Beıjiń qalasynda «CITIC» Wang Jiong» QHR korporatsııasy, «Shenwu» kompanııasy jáne aýyl sharýashylyǵy tehnıkalaryn shyǵarýmen aınalysatyn «Longyuan Shiying Machinery Production Co. Ltd», «YTO Group», «Huanghai Jinma Tractor», «Longtai Shandong» sııaqty ınvestıtsııalyq jáne ónerkásiptik qurylymdardyń ókilderimen ótken kezdesýdiń qorytyndysy shyǵaryldy.
Osy rette, Qytaıdyń ulttyq korporatsııasy azamattyq qurylys, sý tazalaıtyn qondyrǵylar men oblys ortalyǵyndaǵy qoljetimdi turǵyn úı qurylysyna qyzyǵýshylyqtaryn bildirgenin atap ótken jón. Oblys ákimi Qytaı Halyq Respýblıkasyna jasalǵan sapar kezinde kelisimge kelgen kompanııalarmen baılanysty nyǵaıtý jóninde tapsyrma berdi.
Al, kún tártibindegi ekinshi másele QR Tuńǵysh Prezıdenti kúni merekesine oraı ótkizilgen sharalardyń qorytyndylary men Táýelsizdik kúni merekesine daıyndyq týraly oblys ákiminiń orynbasary Aına Mysyrálimova aıtyp berdi. Basty ulttyq merekege oraı 2500 shara ótkizip, 450 myń adamdy qamtý mejelenip otyr. Merekelik sharalar «El júregi - Astana» aıdarymen Astananyń 20 jyldyǵyn toılaý tujyrymdamasy sheńberinde ústimizdegi jyldyń 10 jeltoqsanynan 2018 jyldyń 31 jeltoqsanyna deıin úzbeı júrgizilmek. Sharalar qorytyndysynda saltanatty jıyn ótkizilip, aımaqtyń áleýmettik-ekonomıkalyq damýyna aıryqsha úles qosqan adamdar memlekettik nagradalarmen marapattalatyn bolady.
Jeltoqsannyń 6-sy kúni Memleket basshysynyń qatysýymen ındýstrıaldy telekópir barysynda Stepnogor qalasynyń Aqsý kentindegi «Kazakaltyn Technology» aktsıonerlik qoǵamynyń altyn óndiretin fabrıkasyn ashý josparlanyp otyr.
