«Kóksaraı» - sý tasqynyna baılanysty jaǵdaıdy retteýde óte mańyzdy nysan bolyp otyr
ShYMKENT. QazAqparat - Ońtústik Qazaqstan oblysynda tranzıttik rejımge kóshirilgen Kóksaraı sý qoımasynda 2 mlrd 800 mln tekshe metr sý jınalyp tur. Sý rettegishi dál qazir tolyq qýatymen jumys istep, Shardara sý qoımasynan sekýndyna bir myń tekshe metr sý qabyldaýda, dep habarlaıdy QazAqparat HAA tilshisi.
Bıylǵy qystyń qatty bolýynan kúngeıde erigen qar men jańbyr sýy jyldaǵydan kóp. Sonyń saldarynan sý rettegishindegi sýdyń deńgeıi birshama kóterilipti. Sala mamandarynyń sózinshe, strategııalyq nysan áli de kóp mólsherli sýdy qabyldaýǵa daıyn.
«Kóksaraı sý qoımasyna 2 mlrd 800 mln tekshe metr sý qabyldadyq. Qazir, sý sol kúıinshe qoımada tur. Eger qajet bolsa, taǵy 200 mln tekshe metr sý qabyldaýǵa shamamyz bar. Degenmen ázirge ondaı qajettilik týyndap turǵan joq. Sý tranzıttik baǵytta ketip jatyr»,-deıdi Kóksaraı sý rettegishiniń bastyǵy Qurman Romanov.
Qoımadaǵy jınalatyn sý mólsheri bir ǵana Ońtústik Qazaqstan oblysy men Syr óńirin sýmen qamtamasyz etýge tolyq jetedi. Sondyqtan, bul nysan - sý rettegish qana emes, óńir qaýipsizdiginiń kepili bolyp sanalady.
Eske salaıyq, «Kóksaraı» sý rettigishi elimizde orny erekshe mańyzdy nysan bolyp sanalady. Onyń qurylysyna memleketten 52 mlrd teńge jumsalǵan. Sonyń nátıjesinde eki jarym jyldyń ishinde en dalada kól paıda boldy. Mańyzdy nysan búginde ózen jaǵasyndaǵy birneshe aýyldy tasqynnyń zardabynan birjola qutqaryp otyr.
