Kóksaraı sý rettegishinen 60 myń tekshe metr qum men qıyrshyq tas shyǵaryldy

ASTANA.KAZINFORM - «Qazsýshar» RMK Túrkistan fılıaly Kóksaraı sý rettegishinde aýqymdy mehanıkalyq tazartý jumystaryn júrgizip jatyr.

Sý resýrstary jáne ırrıgatsııa mınıstri Nurjan Nurjigitov nysanda bolyp, jumys barysymen tanysty. Mınıstrlik málimetinshe, búgingi tańda nysannyń joǵarǵy jáne tómengi bólikterinen 60 myń tekshe metr qum men qıyrshyq tas shyǵaryldy. Bul jumystar Kóksaraı sý rettegishiniń ótkizý múmkindigin jaqsartyp, Qyzylorda oblysyna sýdy tıimdi jetkizýdi qamtamasyz etý maqsatynda jasalyp jatyr.

Tazalaýǵa 28 arnaıy tehnıka tartylǵan. Onyń jartysy Qyzylorda fılıalynan jetkizilgen. Jumystar jeltoqsan aıynyń ortasyna, sý jibergenge deıin aıaqtalady dep josparlanyp otyr. Kóksaraı sý rettegishiniń joǵarǵy bóliginde uzyndyǵy 2,5 shaqyrym bolatyn aýmaqta geomembrana tóseý arqyly súzilýdi azaıtý jumystary da júrgizilip jatyr. Bul sý shyǵynyn azaıtyp, sý rettegishte qosymsha 200 mln tekshe metrge deıin sý jınaýǵa múmkindik beredi. Bul jumystarǵa 10 arnaıy tehnıka jumyldyrylǵan.

Vedomstvo basshysy «Qazsýshardyń» Túrkistan fılıalyna súzilýdi azaıtý sharalaryn Kóksaraı sý rettegishiniń basqa ýchaskelerinde de jalǵastyrýdy tapsyrdy.

– Qosymsha jumystardy oryndaýǵa ýaqyt jetkilikti. Qazir aýa raıy qolaıly, sondyqtan qosymsha bir-eki ýchaskede geomembrana tóseýge bolady. Mınıstrlik fılıalǵa qajetti tehnıkany bóldi, barlyq materıal jetkilikti. Kóksaraı sý rettegishiniń keshendi rekonstrýktsııasy bastalǵanǵa deıin onyń jumys tıimdiligin barynsha arttyrý qajet, – dedi Sý resýrstary jáne ırrıgatsııa mınıstri Nurjan Nurjigitov.

Kóksaraı sý rettegishiniń sý jınaý tıimdiligin uzaq merzimge qamtamasyz etý maqsatynda «Qazsýshar» RMK Túrkistan fılıaly uzyndyǵy 36,4 shaqyrym bolatyn bóget ýchaskesinde 60 700 geoshpýnt ornatý jobasyn ázirlep jatyr. Joba júzege asqan soń, sý qoımasy 3 mlrd tekshe metrge deıin sý jınaı alady. Sondaı-aq rekonstrýktsııa sý tasqynynyń aldyn alyp, Soltústik Aralǵa jiberiletin sýdyń kólemin arttyrady.

Aıta ketsek, Túrkistan oblysyna jumys sapary barysynda Sý resýrstary jáne ırrıgatsııa mınıstri Nurjan Nurjigitov óńir turǵyndarymen eseptik kezdesý ótkizip, vegetatsııa kezeńiniń qorytyndysyn aıtty. Ol klımattyń ózgerýine baılanysty sý resýrstaryna degen suranys artyp kele jatqanyn atap ótip, sharýalardy ylǵaldy kóp qajet etetin daqyldardyń egis kólemin qysqartýǵa jáne sý únemdeý tehnologııalaryna kóshýge shaqyrdy.

Osy maqsatta byltyr Sý resýrstary jáne ırrıgatsııa mınıstrligi fermerlerdiń ınfraqurylym tartýǵa, sý únemdeý júıelerin satyp alý men ornatýǵa jumsaıtyn shyǵyndaryn óteý úlesin 50%-dan 80%-ǵa deıin arttyrdy.

Túrkistan oblysynda Kóksaraı kontrrettegishin mehanıkalyq tazartý jumystary bastalǵanyn jazǵan bolatynbyz.