Kókpektidegi qandy oqıǵa: Qylmyskerlerge sot úkimi shyqty
ÓSKEMEN. QazAqparat - Shyǵys Qazaqstannyń Kókpekti aýdanynda Qytaıdan kóship kelgen qazaq áýletiniń eki birdeı adamyn jazym etken qylmyskerlerge qatysty sot úkimi shyqty. Zardap shegýshi tarap bul sheshimge qanaǵattanbaıtyndaryn aıtyp otyr, dep habarlaıdy QazAqparat tilshisi.
Qurylys materıalyn satyp alýshy retinde úıge enip, ákeli-balaly kásipkerlerdi óltirgen Rasýl Ysqaqov pen Suńǵat Safaev ómir boıyna bas bostandyǵynan aıyryldy. Al olardy kólikpen tasyǵan Ivan Fedotov jeti jylǵa sottaldy.
Bul úkimmen marqumdardyń týǵan-týysqandary kelispeı otyr.
«Ivan Fedotovqa jeti jyl ǵana bergeni ádiletsiz. Ol tek kólik júrgizgen degen jeleý aıtyldy. Bizdiń oıymyzsha, bul uıymdasqan qylmystyq is. Sondyqtan úsheýine de eń qatań jaza berilýi kerek edi. Átteń, Qazaqstan zańnamasynda atý jazasy joq. Mundaı jaýyzdardy halyqtyń salyǵyna ómir boıy asyraýdyń ózi ádiletsiz» - deıdi kásipkerdiń inisi Jeńishan Pátihan.
Kinálaýshy taraptyń advokaty Dosbol Ánýarbekov sot úkimi shyqqanymen, ony áli qolǵa almaǵanyn aıtty.
«Sot sheshimimen áli tolyq tanysqan joqpyz. Kelesi aptanyń basynda qolymyzǵa tııýi kerek. Sheshimmen tolyqtaı tanysyp, azamattyq talap-aryzymyz qanshalyqty qanaǵattandyrylǵanyn qaraımyz. Sodan keıin ǵana isti qaıta qaraý máselesin qozǵaımyz. Qylmyskerlerdiń úsheýine de eń aýyr jaza suraǵanbyz. Rasýl Ysqaqov pen Suńǵat Safevqa qatysty jazamen kelisemiz. Al Ivan Fedotovqa taǵaıyndalǵan jaza tym jeńil dep esepteımiz» - deıdi Dosbol Ánýarbekov. 
Eske sala keteıik, byltyr qyrkúıekte bolǵan qandy oqıǵa týraly buǵan deıin jazǵan bolatynbyz.
