Kókpektide úı tonaǵan qaskóıler eki adamdy jer jastandyrdy - ShQO
ASTANA. QazAqparat - Shyǵys Qazaqstan oblysynyń Kókpekti aýdany Kókpekti aýylynda qandy oqıǵa tirkeldi. ShQO ІІD baspasóz qyzmetinen habarlaǵandaı, belgisiz qaraqshylar aýdan ortalyǵyndaǵy bir úıge basyp kirip, eki adamdy óltirip, aqshalaryn tonap ketken, dep habarlaıdy «QazAqparat» HAA tilshisi.
ShQO ІІD baspasóz qyzmetiniń bastyǵy Baqytjan Torǵaevtyń habarlaýynsha, qylmys qyrkúıektiń 10-nan 11-ne qaraǵan túni Kókpekti aýylynda oryn alǵan.
«Belgisiz adamdar úıge basyp kirip, úıdiń ıesine oq atyp, onyń týysyn soqqyǵa jyqqan. Soqqyǵa jyǵylǵan azamat sol jerde qaıtys bolyp, oq tıgen úı ıesi aýrýhanaǵa jetkizilgende jan tapsyrǵan. Sondaı-aq, shabýyldaǵandar úı ishindegi eki áıeldi baılap tastap, úıde bolǵan 1 mıllıon teńgeden astam aqshany ashyq túrde tonap, izin sýytqan», - dep habarlaıdy Baqytjan Torǵaev.
Qylmysty ashyp, tıisti kinálilerdi ustaý úshin ShQO ІІD-de arnaıy tergeý toby qurylǵan. Oǵan ishki ister departamentiniń qyzmetkerleri men Kókpekti aýdandyq ІІB qyzmetkerleri kirip, quqyq qorǵaýshylar jedel izdestirý jumystaryn júzege asyrady.
«Jedel izdestirý jumystaryn júrgizý kezinde qylmysqa kúdikti retinde azamattar anyqtalyp, birneshe saǵattyń ishinde qolǵa tústi. Olar Kókpekti aýdanynyń úsh turǵyny. Qazirgi ýaqytta úsheýi ýaqytsha qamaý oqshaýlaǵyshyna qamalǵan. «Qasaqana adam óltirý» jáne «Qaraqshylyq» tonaý baptary boıynsha polıtsııa qyzmetkerleri sotqa deıingi tergeý amaldaryn júrgizip jatyr. Saraptamalar taǵaıyndaldy. Bolǵan qylmystyń mán-jaıy anyqtalý ústinde», - dep habarlaıdy ShQO ІІD baspasóz qyzmetiniń basshysy.
