Kókpekti-Qaraǵaıly ýchaskesinde «Qarasor» kólin aınalyp ótetin temirjol salynady
ASTANA. QazAqparat - Kókpekti-Qaraǵaıly ýchaskesinde «Qarasor» kólin aınalyp ótetin temirjol salynady. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
«Qazaqstan temir joly» ulttyq kompanııasy poıyzdardyń úzdiksiz jáne qaýipsiz qozǵalysyn qamtamasyz etý, joldardy, sel júrý men kóktemgi sý tasqynyn ótkizýge jasandy qurylystardy ýaqtyly daıyndaý maqsatynda is-sharalar júrgizýde. Bul is-qımyl jospary aıasynda sýdyń shaıyp ketýine qarsy 602 vagonnan turatyn 42 poıyz ázirlenip, qajetti materıaldar men kerekti quraldar daıyndaldy», - dedi mınıstr.
Onyń atap ótýinshe, qaýipti jerlerdiń tizimi jasaldy. Jol bólimsheleriniń, magıstraldyq jeli men jol dıstantsııasy bólimsheleriniń naqty is-qımyldary aıqyndaldy. Aýmaqtyq uıymdarmen birlesip sý qoımalaryna komıssııalyq tekserister júrgizilýde.
Budan bólek, «2017-2020 jyldary tasqyn qaterin eskertý men aldyn alý sharalarynyń jıyntyǵy» Jol kartasy aıasynda uzaqtyǵy 23,6 shaqyrym bolatyn Kókpekti - Qaraǵaıly ýchaskesinde «Qarasor kólin aınalyp ótetin temirjol qurylysyn» salý qarastyrylǵan. Jobalyq-smetalyq qujattamasyn naýryzda aıaqtaımyz. Jalpy, bul ýchaskeniń qurylysyn aıaqtaý merzimi 2019 jyldyń jeltoqsanyna josparlanǵan», - dedi Jeńis Qasymbek.
