Kókpekti aýylynda qaza tapqandardyń otbasylary 1 mln. teńge ótemaqy alady
QARAǴANDY. QazAqparat - Qaraǵandy oblysyndaǵy Kókpekti aýylynda sý tasqyny saldarynan mert bolǵan jandardyń otbasylaryna 1 mln. teńge kóleminde ótemaqy tólenedi, dep habarlady oblys ákimdiginiń baspasóz qyzmetinen.
«Búgin keshqurym aımaq basshysy Baýyrjan Ábdishev Kókpekti aýylynyń turǵyndarymen kezdesti. Ol qazirgi ýaqytta jaǵdaıdyń baqylaýda ekendigin, barlyq zardap shekkenderge tıisti kómek kórsetiletindigin málim etti.
Oblys ákimi eshkimniń de eleýsiz qalmaıtyndyǵyna sendirdi. Munda medıtsınalyq kómek, tamaqtandyrý uıymdastyryldy.
«Aımaq basshysy sý bógetiniń buzylýy saldarynan ajal qushqan aýyldyń 5 turǵynynyń týǵan-týystaryna kóńil aıtty. Marqumdardy jerleýdiń barlyq shyǵynyn jergilikti bılik organdary kóteretindigin jetkizdi»,- delingen habarlamada.
Úısiz qalǵan otbasylar mektep pen eki jataqhanaǵa ornalastyryldy.
Qazirgi ýaqytta QR TJM qutqarýshylary, apattar medıtsınasynyń bólimsheleri, Azamattyq qorǵanys polki, ishki áskerdiń áskerı qyzmetshileri, Qorǵanys mınıstrligi, densaýlyq saqtaý basqarmasy, baılanys qyzmeti, veterınarlyq jasaq pen jergilikti atqarýshy organdar sý tasqyny saldaryn joıý jumystarymen shuǵyldanýda.
