Kókpardy úlken stadıondarǵa shyǵarý kerek
ASTANA. 4 sáýir. QazAqparat - Kókpardy úlken stadıondarda oınatý qajet. Bul týraly QR Sport jáne dene shynyqtyrý agenttigindegi ulttyq sport máselesine arnalǵan keńeste Qazaqstannyń eńbek sińirgen qaıratkeri, Ulttyq At sporty federatsııasynyń prezıdenti Sádibek Túgel málim etti.
«Bizdiń kókpardy fýtbol sekildi úlken stadıondarda oınatý kerek. ıAǵnı, kókpardyń jasaqtalǵan tıisti alańy bolý tıis. Osyǵan qol jetkizý úlken másele»,-dep toqtaldy ol.
S. Túgeldiń paıymdaýynsha, birinshi kezekte mamandar kerek. «Ulttyq sport damyp, ósip kele jatyr, al mamandar deńgeıi tómen. Ásirese, tóreshiler men jattyqtyrýshylardy daıarlaýǵa ekpin jasaý qajet»,-dedi ol.
Onyń sózine qaraǵanda, búginde amerıkalyqtar qazaq halqynyń ulttyq oıyny - kókparǵa qyzyǵýshylyq tanytýda. «Máselen, AQSh-tyń amerıkalyq fýtboly - jaıaý kókpar. Al bizdiki attyń ústindegi tartysty doda. Osy turǵyda olar qulshynys tanytyp otyr»,-dedi S. Túgel.
