Kókpardan I ashyq Azııa chempıonatyna 8 memlekettiń quramasy qatysady
ASTANA. 9 qyrkúıek. QazAqparat - Kókpardan I ashyq Azııa chempıonatyna 8 memlekettiń quramasy qatysady. Bul týraly búgin Astanada ótken baspasóz máslıhatynda QR Ulttyq sport túrleri federatsııasynyń birinshi vıtse-prezıdenti Bekbolat Tileýhan málim etti.
Uıymdastyrýshylardyń aıtýynsha, chempıon 10-15 qyrkúıek kúnderi «Qazanat» atshabarynda ótedi. Birinshilikke Azııanyń 8 memleketi: Aýǵanstan, Qyrǵyzstan, Mońǵolııa, Túrkııa, Qytaı, Reseı, Tájikstan, Ózbekstan elderi qatysady. Kókpardan I ashyq Azııa chempıonatynyń bas demeýshisi - «Samuryq-Qazyna» Ulttyq ál-aýqat qory» AQ.
Aıta keteıik, kókpar - Ortalyq Azııadaǵy kóshpeli halyqtyń kóne ulttyq sport oıyny. Keıingi jyldary Qazaqstan kókpardy jandandyrýdy qolǵa alyp keledi. Nátıjesinde, kókpardan halyqaralyq sport federatsııasy qurylyp, oǵan aımaqtaǵy memlekettermen qatar, Qytaı, Pákistan, Túrkııa, tipti Frantsııa da endi. Qazirgi tańda Qazaqstanda jyl saıyn eresekter jáne jastar arasynda ulttyq chempıonattar uıymdastyrylýda. Sondaı-aq aýyldyq jáne aýdandyq deńgeıde 300-den astam týrnır ótkizedi.
Kókpar oınynyń erejesine sáıkes, komanda on salt attydan quralady. Alaıda alańǵa ár komandadan tórt oıynshydan shyǵady. Ózge sport túrlerindegideı kókparda da oıynshy almastyrylady, ári tek sportshyny ǵana emes, jylqyny da aýystyrýǵa bolady. Oıyn jıyrma mınýttyq eki taımnan turady. Oıynda úsh tóreshi qazylyq etedi. Ereje boıynsha, oıynshy jerden serkeni kóterip jatqanda shabýyl jasaýǵa bolmaıdy, qarsylasty qamshymen sabaýǵa, kórermender jaqqa shabýǵa, oljaǵa ıe bolǵan adamdy atynan qulatýǵa nemese serkeni artynan turyp tartýǵa tyıym salynǵan. Oıyn erejesin buzǵan sportshy 2 mınýtqa qýylady. Bir oıynshyǵa kem oınaý birden oıyn esebine áser etedi. Kókpar qarapaıym bolsa da, tehnıkalyq jaǵynan kúrdeli oıyn. Ol úshin kóp ári uzaq jattyǵý kerek. Úzdik oıynshylardyń jasy ádette 40-tan asady.
