Kókpardan basty qarsylasymyz — qyrǵyz baýyrlar — komanda kapıtany Turǵanbek Qurmanbek

ASTANA. KAZINFORM — V Dúnıejúzilik kóshpendiler oıyndarynda kókpardan Qazaqstan quramasynyń basty qarsylasy — qyrǵystandyq kókparshylar. Bul týraly QR kókpar qurama komandasynyń kapıtany Turǵanbek Qurmanbek aıtty, dep habarlaıdy QazAqparat tilshisi. 

«Búgin alǵashqy kezdesý Ózbekstan qurama komandasymen ótti. Attarymyzdy taktıkalyq turǵydan daıyndadyq, alańǵa úırettik. Jigitterdiń de, attarymyzdyń da shabysy keremet boldy. Fınalda elimizdiń kók týyn jelbiretýge daıynbyz. Basty qarsylasymyz qyrǵyz baýyrlarymyz dep oılaımyz. Biz bar kúshimizdi salamyz. Qazaq eli bizge senim artyp otyrǵanyn bilemiz. Buıyrsa sol senimdi aqtaýǵa daıynbyz», — deıdi Turǵanbek Qurmanbek.

Aıta keteıik, V Dúnıejúzilik kóshpendiler oıyndaryna baq synaýǵa kelgen kókparshylar «Qazanat» ıppodromynda irikteý jarystaryn ótkizip jatyr. Alǵashqy kezdesý Qazastan jáne Ózbekstan qurama komandasynyń kókparshylary arasynda ótti. Tartysty ótken saıysta, qazaqstandyq shabandozdardyń mereıi ústem bolyp, 16:0 esebimen aıqyn jeńiske jetti.

Kókpardan 9 memlekettiń sportshylary ózara myqtyny anyqtaıdy. Bul sport túrinen barlyǵy 104 sportshy qatysady.

Kókpardan baq synaıtyn quramalar: Qazaqstan, AQSh, Reseı, Ózbekstan, Qyrǵyzstan, Vengrııa, Qytaı, Mońǵolııa jáne Túrkııa.