Kókpardan Azııa chempıonaty: Qazaqstan quramasy qarsylasyn oısyrata jeńdi
ALMATY. QazAqparat - Ulttyq at sportynan ótip jatqan І Azııa chempıonatynda qazaqstandyq kókparshylar qarsylastaryn 10:3 esebimen jeńdi, dep habarlaıdy QazAqparat tilshisi.
QR Ulttyq sport qaýymdastyǵy málim etkendeı, jarystyń ekinshi kúni alǵashqy bolyp kókpar dodasyn Qytaı men Mońǵolııa komandalary bastady. Bul eki komanda da keshe qarsylas shaq keltirmeı jeńimpaz atanǵan edi.
Alaıda, búgin Mońǵolııa komandasy aspan astynan kelgen kókparshylardy 5:3 esebimen utyp, jarysty ary qaraı jalǵastyrýǵa múmkindik aldy.
Al, búgingi kúnge belgilengen Tájikstan men Reseı komandalary arasyndaǵy oıyn ótpeı qaldy. Oǵan sebep, Tájikstan komandasyndaǵy sportshylardyń jas ereksheligi erejege saı kelmegendikten jarys alańyna jiberilgen joq. Sol sebepti Reseı quramasy saıysqa túspeı-aq, jeńimpazdar qatarynan kórindi.
Kókparshylar saıysynyń búgingi qorytyndysyn Qazaqstan men Aýǵanstan oıynshylary túıindedi. Jankúıerler bul oıyndy asyǵa kútkeni anyq edi.
«B» tobynda jupsyz bolǵandyqtan, keshegi kúni oıynnan tys bolǵan aýǵanstandyqtar chempıonattaǵy oıynyn búgin ǵana bastaǵan bolatyn. Aýǵanstan kókparshylarynyń alǵashqy kezdegi oıyndary sátti bastalyp, ekinshi nómirli oıynshy Pahlavan Sefattýlla men jetinshi nómirli oıynshy Karımı Masýd kezdesýdiń segizinshi, toǵyzynshy mınýttarynda edel-jedel eki salym salyp, bapkerleriniń kóńilin bir kóterip tastady. Tipti, oıynnyń birinshi kezeńindegi esep - 4:2 boldy. Biraq, sodan keıingi ýaqyttarda olardyń ekpinderin jerlesterimiz sý sepkendeı basty.
Bizdiń jas kókparshylar ekinshi kezeńde qarsylastaryna jalǵyz salym salýǵa ǵana múmkindik berdi. Sóıtip, bul kezdesý 10:3 esebimen qazaqstandyq jas kókparshylardyń aıqyn basymdylyǵymen aıaqtaldy.
Jastar jylyna oraı uıymdastyrylyp jatqan birinshiliktiń jalpy júlde qory 16 mıllıon teńgeni quraıdy. Chempıonatty Almaty oblysy ákimdiginiń qoldaýymen QR Ulttyq sport qaýymdastyǵy uıymdastyryp jatyr. Atalǵan dodaǵa Azııanyń 10 elinen sportshylar qatysýda. Olar kókpar, aýdaryspaq, teńge ilý jáne jamby atý sportynan baq synaıdy. Jarys 21 sáýir kúni óz máresine jetedi.
Aıta keteıik, keshe jarystyń alǵashqy kúngi nátıjesin bergen bolatynbyz.
