Kókpardan Azııa chempıonaty: Alǵashqy kúnniń jeńimpazdary anyqtaldy
ALMATY. QazAqparat - Almatyda Ulttyq at sportynan alaýy tutanǵan І Azııa chempıonatynyń birinshi jarys kúni aıaqtaldy. Nátıjesinde kókpardan úsh komanda alǵashqy jeńisterine qol jetkizdi, dep habarlaıdy QazAqparat tilshisi.
QR Ulttyq sport qaýymdastyǵynan málim etkendeı, búgin «A» tobynan Monǵolııa men Qytaı komandalary, al «B» tobynan Qazaqstan komandasy alǵashqy jeńisine qol jetkizip, kelesi kezeńge joldama aldy.
Atap aıtqanda, Mońǵolııa quramasy Tájikstannan kelgen qarsylastarymen synǵa túsip, 4:2 esebimen jeńiske jetti.
Ekinshi bolyp alańǵa Qytaı men Reseı quramalary shyqty. Nátıjesinde qytaılyq oıynshylar qarsylastaryn 10:1 esebimen oısyrata utyp, jartylaı fınalǵa iri eseppen ótti.
Búgingi kókparshylar saıysyn sońǵy bolyp Qazaqstan men Ózbekstannyń jastar quramalary túıindedi. Saıys alǵashqy sátterden bastap tartysty órbidi. Qazaqstan komandasynyń kapıtany Qurmanbek Turǵanbek oıynnyń alǵashqy 8-sekýndynda esep ashty. Oıyn 13:2 esebimen jerlesterimizdiń aıqyn jeńisimen aıaqtaldy.
Aıta keteıik, Jastar jylyna oraı uıymdastyrylyp jatqan birinshiliktiń jalpy júlde qory 16 mıllıon teńgeni quraıdy. Chempıonatty Almaty oblysy ákimdiginiń qoldaýymen QR Ulttyq sport qaýymdastyǵy uıymdastyryp jatyr.
Atalǵan dodaǵa Azııanyń 10 elinen sportshylar qatysýda. Olar kókpar, aýdaryspaq, teńge ilý jáne jamby atý sportynan baq synaıdy.
Jarys 21 sáýir kúni óz máresine jetedi.
