Kókpar VI Dúnıejúzilik kóshpendiler oıyndaryna jeke sport túri retinde engizildi
ASTANA.KAZINFORM - VI Dúnıejúzilik kóshpendiler oıyndary Qyrǵyzstanda 2026 jyldyń 31 tamyzynan 6 qyrkúıegine deıin ótedi, dep habarlaıdy Kazinform agenttiginiń Bishkektegi tilshisi.
Qyrǵyzstan Respýblıkasynyń Dene shynyqtyrý jáne sport jónindegi memlekettik agenttiginiń málimeti boıynsha, VI Dúnıejúzilik kóshpendiler oıyndarynda kókpar jarystary jeke sport túri retinde ótkiziledi.
Oıyndarǵa shamamen 2800–3000 sportshy qatysady. Jarystar 43 sport túrinen ótedi, onyń 20-sy qyrǵyz ulttyq oıyndary.
Ashylý saltanaty el astanadasyndaǵy jańa «Bishkek Arena» stadıonynda, al sporttyq is-sharalar Ystyqkól oblysynda ótedi.
Buǵan deıin 60-tan astam el VI Dúnıejúzilik kóshpendiler oıyndaryna qatysatynyn rastaǵany habarlanǵan bolatyn.
Jaqynda Bishkekte oıyndarǵa neshe kún qalǵanyn eske salyp turatyn elektrondy keri sanaq taqtasy resmı túrde iske qosyldy.
Sondaı-aq, biz barystyń 2026 jylǵy Dúnıejúzilik kóshpendiler oıyndarynyń talısmany retinde tańdalǵanyn habarladyq.
