Kókpar oıyny kezinde Aqmola oblysynda jasóspirim qaza tapty
ASTANA. KAZINFORM – Aqmola oblysynda kámeletke tolmaǵan jasóspirimniń qaza tabýyna baılanysty polıtsııa qylmystyq is qozǵady, dep habarlaıdy Kazinform agenttiginiń tilshisi.
Aqmola oblysy polıtsııa departamentiniń baspasóz qyzmeti aldyn ala málimet boıynsha qaıǵyly oqıǵanyń 26 mamyr kúni Tselınograd aýdanynda ulttyq kókpar oıynynyń jattyǵýy kezinde bolǵanyn habarlady. 14 jastaǵy jasóspirim attan qulap, kóz jumǵan.
– Qazirgi ýaqytta polıtsııa qyzmetkerleri oqıǵanyń barlyq mán-jaıyn anyqtaýǵa baǵyttalǵan sotqa deıingi tergep-tekserý jumystaryn júrgizip jatyr. Tergeý aıasynda jattyǵýdy uıymdastyrýshylardyń jáne qatysýshylardyń qaýipsizdigin qamtamasyz etýge jaýapty tulǵalardyń áreketine quqyqtyq baǵa beriledi, – dep habarlady vedomstvo.
Tselınograd aýdany ákimdigi qaıǵyly oqıǵanyń Raqymjan Qoshqarbaev aýyldyq okrýginiń aýmaǵynda bolǵanyn naqtylady.
– Jergilikti turǵyndar jeke bastamamen jattyǵý oıyndaryn ótkizgen. Bul oıyndar resmı sporttyq nemese buqaralyq is-shara emes. Aýdan ákimdigine atalǵan oıyndardyń ótkiziletini týraly habar berilmegen, sondaı-aq jergilikti atqarýshy organǵa kelisim alý jóninde ótinishter men suranystar túspegen, – dep túsindirdi ákimdik.
Qolda bar málimet boıynsha oıynǵa eresek azamattar qatysqan. Kámeletke tolmaǵan jasóspirim oıyn ótetin jerge týystarymen birge kelgen jáne kelmeı qalǵan qatysýshylardyń biriniń ornyna oıynǵa qosylǵan.
– Sondaı-aq atalǵan eldi mekende aýdandyq nemese oblystyq mekemelerdiń balansynda turǵan memlekettik kókpar sektsııalary joq ekenin habarlaımyz. Іs-shara M.S.Nárikbaev atyndaǵy Qazaq gýmanıtarlyq zań ýnıversıtetiniń menshigindegi jer teliminde ótkizilgen. Jer teliminiń jalǵa alýshysy – jeke tulǵa. Qazirgi ýaqytta ýákiletti organdar tekserý júrgizip jatyr. Jergilikti atqarýshy organdar Qazaqstan Respýblıkasynyń qoldanystaǵy zańnamasy aıasynda qajetti járdem kórsetip jatyr, – dep habarlady vedomstvo.
Aıta keteıik, bıyl sáýir aıynda Túrkistan oblysynda jarysqa bara jatqan 3 jasóspirim jol apatynan kóz jumǵanyn jazdyq.
