Kókpar men aýdaryspaqtan 10 kúnge sozylǵan el chempıonaty qorytyndylandy
JAMBYL. QazAqparat - Jambyl oblysynda Kókpar men aýdaryspaqtan HHІ el chempıonaty qorytyndylandy. 10 kúnge sozylǵan saıysta ár óńirden kelgen shabandozdar at ústine óz eptilikterin kórsetti, dep habarlaıdy QazAqparat tilshisi.
Dúbirli dodaǵa Nur-Sultan, Almaty, Shymkent qalalary men 14 óńirden 300-ge jýyq kókparshy qatysty. Aýdaryspaqqa qatysýshylar 8 salmaq dárejesi boıynsha synǵa tústi. Al, kókparshylar jekeleı jáne komandalyq esepte 3 orynǵa talasty.
Barlyq komandalar joǵary daıyndyqpen kelgeni alǵashqy sátterden-aq aıqyn kórindi. Semiz serkeni taqymǵa qysqan kókparshylar salym salýǵa asyqsa, bilekti jigitter at ústinde kúsh synasty.
Jambyl aýdany, Bektóbe aýylynda ornalasqan «Atshabarda» ótken saıysty tamashalaýǵa kelgen jankúıerler qyzyqty sátterdiń kýási boldy.
Jarys qorytyndysy boıynsha Almaty oblysy Birinshi lıganyń jeńimpazdary atanyp, Joǵarǵy lıgada óner kórsetý quqyǵyna ıe bolsa, ekinshi oryn mańǵystaýlyqtarǵa buıyrdy. Al, qola júlde Shymkenttik quramasynyń enshisinde qaldy.
Joǵary lıganyń oıyndary nátıjesinde Jambyl oblysy quramasy úzdik atandy. Al, kúmis medaldy túrkistandyqtar ıelense, úzdik úshtikti Atyraýlyq komanda túıindedi.
Al, aýdaryspaq saıysynan ár salmaq boıynsha úzdikter anyqtalyp, jeńis tuǵyryna kóterildi.
