Kókpar alańyna kólikpen kirip ketken: Qyzylorda polıtsııasy qylmystyq is qozǵady

QYZYLORDA. KAZINFORM — Telegram áleýmettik jelisinde Qyzylorda oblysynda kókpar kezinde júrgizýshi kólikpen oıyn alańyna kirip ketip, birneshe jylqyny qaǵyp ketkeni týraly beınejazba tarady. 

Buǵan baılanysty Qyzylorda oblystyq polıtsııa departamentiniń baspasóz qyzmeti túsinikteme berdi.

— Áleýmettik jelide jarııalanǵan beınejazba boıynsha tekserý júrgizildi. Oqıǵa 2025 jyldyń 1 qarashasynda Shıeli aýdanynyń Alǵabas aýylynda kent turǵyny uıymdastyrǵan kókpar oıyny kezinde bolǵan. Oıyn barysynda 102 arnasyna eshqandaı habarlama túspegen. Qazirgi ýaqytta buzaqylyq deregi boıynsha qylmystyq is qozǵaldy, — delingen habarlamada.

Departamenttiń baspasóz qyzmeti avtokólik júrgizýshisiniń polıtsııa bólimine jetkizilgenin málimdedi.

— Sotqa deıingi tergep-tekserý aıasynda oqıǵaǵa qatysqan barlyq tulǵanyń áreketine quqyqtyq baǵa beriledi. Esterińizge salamyz, kez kelgen sporttyq-buqaralyq nemese mádenı-buqaralyq is-shara ótkizgen kezde ýákiletti organdardy aldyn ala habardar etý qajet. Mundaı is-sharalardy uıymdastyrý tártibin buzǵany úshin uıymdastyrýshy tulǵa ákimshilik jaýapkershilikke tartyldy, — delingen habarlamada.

Buǵan deıin Qyzylorda qalasyndaǵy mektepterdiń birinde oqýshyny jasóspirimder jabylyp urǵan oqıǵa beınekameraǵa túsip qalǵan bolatyn.