Kókónisten 40 ese paıdaly: Óskemendik áıel úıinde mıkrojasyl ósimdik ósirip, tabys taýyp otyr
ÓSKEMEN. KAZINFORM — Óskemendik Nurgúl Alpysbaı úıinde mıkrojasyl ósimdik ósirýdi kásip kózine aınaldyrǵan. Bólmege 24 saǵat qosylyp turatyn jaryq tartyp alyp, ádis-tásilderin meńgergen. Taǵamǵa paıdalanylatyn bul ósimdikterdiń aǵzaǵa paıdasy kádimgi kókónisterge qaraǵanda 40 ese kóp.
Úıde otyryp isteıtin jumys Nurgúl Alpysbaı úıde otyryp tabys tabýǵa bolatyn jumys izdegen. Sóıtip ınternetten mıkrojasyl óskinder ósirý týraly kórip qalady. Sol kezde osy iske kirisýge bel baılaǵan.
— Áýeli jaýaby joq kóp suraq boldy. Biraz ýaqyt izdenýge týra keldi. Kajeti joq tuqymdardy molynan satyp alyp qoıdym. Bilmegendikten ǵoı, sapasy nashar tukymnyń biri shyǵyp, biri shyqpaı qaldy. Múlde kádege jaramaǵan túrli qymbat tyńaıtqyshtardy da bosqa aldym. Ýaqyt óte kele tájirıbem jınaqtalyp, bári túsinikti bola bastady, — deıdi ol.
Mıkrojasyl óskinderdi ósirýdiń mańyzdy úsh sharty bar eken. Birinshisi, sapaly tuqym tańdaý, ekinshisi jaryq, úshinshi ýaqtyly sýaryp otyrý.
— Eń úlken suranys asburshaqqa, shalǵamǵa jáne nasybaıgúlge bolady. Tuqymdy Reseıden alamyn. Óskemenge jetkenshe 1 aıdaı ýaqyt ketedi. Basynda azdan alyp tekserip kóremin. Tuqymnyń sapasy qandaı, neshe paıyzy ónip shyǵady, tuqymdar kókke shaldyqqan emes pe, sonyń bárin tekserip otyrý kerek, — deıdi Nurgúl Alpysbaı.
Eń tez ósetin mıkrojasyl óskinderge tyńaıtqysh qajet emes. Óıtkeni olar 7-10 kúnde daıyn bolyp qoıady. Al 15-30 kúnde ósip shyǵatyn óskinder tyńaıtqyshty talap etedi.
— Uzaq ósetin bolǵandyqtan bul óskinder tyńaıtqysh bolmasa múlde óspeıdi. Bir aptada shamamen 200-300 ónim satylady. Basynda klıent tabý ońaıǵa soqpady. Meıramhanalardy aralap, mıkrojasyldardy kórsetip, aspazdarmen kelise bastadym. Ary qaraı ózderi maǵan habarlasatyn boldy. Búginde 50-den astam meıramhana, dámhanalarmen jumys isteımin, — deıdi óskemendik áıel.
Paıdaly ári óte dámdi
Bul kásibi otbasynyń qarjylyq jaǵdaıyn jaqsartýǵa úles qosqan. Qazir aıyna shamamen 700 myń teńge tabys taýyp otyr.
— Mıkrojasyl óskinderdiń aǵzaǵa paıdasy ushan-teńiz. Dárýmenderge, antıoksıdanttarǵa baı bolǵandyqtan ımmýnıtetti kóteredi. Jaı salat japyraqtary men pisip jetilgen kókónisterge qaraǵanda dárýmenderi men mıneraldary 40 ese artyq. Biz otbasymyzben óskinderdi kún saıyn salat túrinde qoldanamyz. Paıdaly ǵana emes, ári óte dámdi, — deıdi Nurgúl Alpysbaı.
Mıkrojasyl óskinder — bul tez buzylatyn «premıým-segmenttegi» ónim. Negizgi mindet — ony ósirý emes, taýarlyq túrin joǵaltqanǵa deıin satyp úlgerý.
Keıipkerimiz elektr jaryǵyna aıyna 30-35 myń teńge aralyǵynda tóleıtinin jetkizdi. Al óskinder sýdy kóp qajet etpeıdi eken. Bul tehnologııa dástúrli eginshilikpen salystyrǵanda sýdy 90-95%-ǵa deıin únemdeýge múmkindik beredi.
— Óskinderdi jylyna 365 kún ósiremiz. Jabyq jerde ósetin bolǵandyqtan jyl mezgiline qaramaımyz. Aldaǵy ýaqytta jeke tseh ashsam ba degen oıym bar. Mıkrojasyldan basqa da salat túrlerin ósirip kórsem be deımin, — dep sózin aıaqtady ol.
Eske salsaq, elordada isker áıelder bas qosqany jaıly jazǵanbyz.
