Kókónis qoımasyn salýshylarǵa memleket qandaı qoldaý kórsetedi

ASTANA. KAZINFORM – Elimizde kókónis qoımalaryn salý kezinde salqyndatqysh jáne jeldetkish jabdyqtarǵa jumsalǵan aqshanyń teń jarty somasyn memleket tóleıdi. Bul týraly Kazinform agenttiginiń resmı saýalyna Aýyl sharýashylyǵy mınıstrligi joldaǵan resmı jaýapta aıtylǵan.

— Oblystar, Astana jáne respýblıkalyq mańyzy bar qalalardyń ákimdikterimen jáne tıisti memlekettik organdarmen birlesip, 2023–2025 jyldarǵa arnalǵan kókónis saqtaý qoımalaryn salý jáne jańǵyrtý jónindegi keshendi jospardy bekitilgen. Sonymen qatar, 2024–2026 jyldarǵa arnalǵan AÓK ınvestıtsııalyq jobalaryn iske asyrý jónindegi Jol kartasy aıasynda astyq saqtaý qoımalaryn salý, jańǵyrtý jáne keńeıtý boıynsha jobalar júzege asyrylyp jatyr, - delingen habarlamada.

Vedomstvo málimetinshe, kartop jáne kókónis saqtaý qoımalaryn salý men jańǵyrtýǵa ınvestıtsııa tartýdy yntalandyratyn birqatar tásil iske asyrylady.

— Agroónerkásiptik keshen sýbektileri ınvestıtsııalyq salymdarynyń bir bóligin óteý qaǵıdasy (2018 jylǵy 23 shildede QR Aýyl sharýashylyǵy mınıstriniń №317 buıryǵymen bekitilgen) sheńberinde sýbsıdııa beriledi. Sýbsıdııa mólsheri jabdyqtyń túrine baılanysty 25%-dan 40–50%-ǵa deıin ulǵaıtyldy: salqyndatqysh jabdyq úshin – 50%, jeldetkish jabdyq úshin – 40%, - dep málimdedi vedomstvo.

Budan bólek, Soltústik Qazaqstan oblysynyń tájirıbesin taratý aıasynda kókónis saqtaý qoımalaryn qarjylandyrý kózdelgen. Jalpy, 2024 jyly osy baǵdarlama aıasynda respýblıkalyq bıýdjetten 100 mlrd teńge bólinse, aǵymdaǵy jyly 200 mlrd teńge qarastyrylǵan.

Sondaı-aq AÓK sýbektilerin qoldaý maqsatynda mınıstrlik astyq saqtaý qoımalaryn salý men keńeıtý shyǵyndarynyń 25%-yn óteýdi kózdeıdi.

Aıta keteıik, elimizde áleýmettik mańyzy bar azyq-túlik taýarlary tranzıtine baqylaý kúsheıdi.