Kókónis qoımalaryn salýǵa sýbsıdııa kólemi 50%-ǵa deıin artty
ASTANA. KAZINFORM — Óńirlerde aýyl sharýashylyǵy ónimderin saqtaý ınfraqurylymyn damytý boıynsha jumystar jalǵasyp jatyr.
Kókónis jáne jemis-kókónis ónimderin saqtaý qoımalaryn arttyrý maqsatynda Aýyl sharýashylyǵy mınıstrligi óńirlerdiń ákimdikterimen birlesip, 2023–2025 jyldarǵa arnalǵan kókónis qoımalaryn salý jáne jańǵyrtý jónindegi Keshendi jospardy iske asyrdy.
Onda jalpy syıymdylyǵy 689,9 myń tonna bolatyn 92 jobany iske asyrý kózdelgen. 2023–2025 jyldardyń qorytyndysy boıynsha 95 kókónis qoımasy paıdalanýǵa berildi, olardyń jalpy syıymdylyǵy 745,6 myń tonna.
Byltyr kókónis qoımalaryn salý jáne jańǵyrtý jobalary 11 oblys pen Shymkent qalasynda iske asyryldy.
Odan ári damytý maqsatynda memleket tarapynan ınvestıtsııalyq qoldaý sharalary qarastyrylǵan. Agroónerkásiptik keshen sýbektileriniń ınvestıtsııalyq salymdar kezinde jumsaǵan shyǵyndarynyń bir bóligin óteýdi sýbsıdııalaý qaǵıdalary sheńberinde № 22 «Syıymdylyǵy 1 000 tonnadan bastalatyn kartop-kókónis qoımalaryn salý, keńeıtý» jobasynyń pasporty qoldanylady.
Investıtsııalyq shyǵyndardyń bir bóligin óteý mólsheri 25%-dan 40–50%-ǵa deıin ulǵaıtyldy. Nysannyń jabdyqtalýyna qaraı salqyndatý jabdyǵy bar jobalardy sýbsıdııalaý mólsheri 50%-ǵa deıin, al jeldetý jabdyǵy bar jobalar úshin 40%-ǵa deıin belgilengen.
Sondaı-aq Soltústik Qazaqstan oblysynyń tájirıbesin áleýmettik-kásipkerlik korporatsııalar arqyly taratý baǵdarlamasy sheńberinde kókónis qoımalaryn salýdy jeńildetilgen qarjylandyrý kózdelgen.
Jobalardy qarjylandyrý senim bildirilgen agent arqyly jyldyq 2,5% mólsherlememen, 10 jylǵa deıingi merzimge júzege asyrylady.
Jalpy, elimizde syıymdylyǵy 2,56 mln tonna bolatyn 941 kókónis qoımasy jumys isteıdi.
Oblystar boıynsha naqty málimetterge súıensek, Pavlodar oblysynda — 591,5 myń, Jambyl oblysynda — 375 myń, Qaraǵandy oblysynda — 357,8 myń, Túrkistan oblysynda — 184,9 myń, Shymkent qalasynda — 130,5 myń, Almaty oblysynda — 128,2 myń, Mańǵystaý oblysynda — 105,5 myń, Aqmola oblysynda — 104,8 myń jáne Soltústik Qazaqstan oblysynda — 104,8 myń tonna.
Saqtaý ınfraqurylymyn damytý jumystary óńirlerdiń qajettilikteri men óndiriletin aýyl sharýashylyǵy ónimderiniń kólemin eskere otyryp, ári qaraı jalǵastyrylatyn bolady.
Ásirese, kartop, kókónis jáne jemis-kókónis ónimderin óndirýge mamandanǵan óńirlerge basa nazar aýdarylady.
Qabyldanyp jatqan sharalar respýblıkada saqtaý syıymdylyqtaryn ulǵaıtýǵa, óndirilgen ónimniń saqtalýyn qamtamasyz etýge jáne ishki azyq-túlik naryǵynyń turaqtylyǵyn arttyrýǵa baǵyttalǵan.
Aıta ketelik 10 myń tonna kartop pen kókónis saqtaıtyn qoımalar salynatyny týraly jazǵan edik.
